Ádil Ahmetov dinder sezi týraly: Qazaqstannyń bedeline bedel qosty
«Kesheden beri ótip jatqan Álemdik jáne dástúrli din kóshbasshylarynyń VII sezinen túıgen oılar kóp. Sonyń bárin túıindep aıtsaq, katolık dininiń kóshbasshysy – Rım Papasynyń kelýi sharanyń mánin arttyrdy. Álemde dinder de kóp, din kóshbasshylary da kóp. Biraq Rım Papasy Frantsısk qulaqqa kiretin áńgime aıtty. Ol jaı ǵana, jalpylama sóılegen joq. Mynaý din kóshbasshylarynyń álemdegi rólin bizdiń eldiń qundylyǵymen baılanystyryp aıtty. Birinshi kúni dombyranyń sınhrondy ún shyǵaratyn aspap ekenin aıta kelip, úılesim qundylyǵyna óte úlken mán berdi. Dombyrasy bar eldiń tegin halyq emes ekenin dáleldep aıtqandaı boldy. Alkeshe Abaı fılosofııasyn taldap berdi. Abaıdyń sózderi jalǵyz qazaq úshin emes, álem úshin aıtylǵandaı ǵoı. Abaı fılosofııasyndaǵy «Allany súı», «Adamdy súı» degen sııaqty túıinder dinı qundylyqpen de úılesetinin dáıektep aıtyp berdi», - dedi memleket qaıratkeri.
Ǵalym Rım Papasy Frantsısktiń Qazaqstanǵa kelýin 2001 jylǵy Rım Papasynyń saparymen salystyryp, oı bólisti.
«Keshegi Messaǵa álemniń ár túkpirinen 10 myńǵa jýyqa adam jınaldy dep jatyr. 2001 jyly ІІ Ioan Pavel kelgende de osyndaı Messa ótken. Ol Rım Papasynyń da sózi maǵynaly bolǵan. Idaýızm, hrıstıan jáne ıslam dinderiniń túbir bir ekenin, Ibragım paıǵambardan bastalatynyn eske salǵan. «Eger olardyń aıyrmashylyqtaryna basa mán beretin bolsaq, bir-birimizden alystaımyz. Al úsheýiniń arasyndaǵy óte kóp ortaq qundylyqtarǵa kóbirek mán bersek, jer júzindegi halyqtyń basy birigedi», - degen sóz aıtqan edi. Qazirgi papa Frantsısk sol yqylasty qaıtalap turǵandaı sezildi», - dedi Ádil Ahmetov.
Ǵylym doktory sharadan álemdegi tanymal arnalar men basylymdardyń habar taratyp jatqanyna da nazar aýdaryp otyr. «Sharaǵa kelgen din kóshbasshylarynyń tizimin qarasańyz, álemniń búkil qıyryn qamtyǵan. Eń bastysy, sonyń bárin BAQ arqyly búkil jer júzi kórip jatyr. Arasynda CNN, Euronews sııaqty halyqaralyq aqparat quraldary da habar taratyp júr. Bul jetinshi forýmnyń aıyrmashylyǵy – jańa ıdeıalar, tyń sózder aıtylyp jatyr. Qysqasy, bul shara Qazaqstannyń bedeline bedel qosty.
Óıtkeni 1 mlrd 300 mln ustanýshysy bar katolık dininiń kóshbasshysynyń kelýi – úlken saıası qubylys. Óıtkeni onyń jer júzindegi róli úlken. Qazaqtyń eshqashan ólmeıtin dombyrasy men eshqashan qundylyǵy joıylmaıtyn Abaıǵa silteme jasaýy qazaq memleketi úshin úlken dúnıe dep oılaımyn»,- dep túıindedi qoǵam qaıratkeri.
