Ádil Ahmetov: Áleýmettik jelini baqpaǵan sheneýnik durys sheshim qabyldaı almaıdy

NUR-SULTAN. QazAqparat - Árbir mınıstr, árbir bılik basyndaǵy azamat áleýmettik jelidegi bolyp jatqan dúnıeni bilmese, ol durys sheshim qabyldaı almaıdy. QR Prezıdenttigine kandıdattyń memlekettik tildi meńgerý deńgeıin anyqtaıtyn lıngvıstıkalyq komıssııa múshesi Ádil Ahmetov osylaı dedi, dep habarlaıdy QazAqparat tilshisi QR Prezıdenti ulyqtaý rásiminde aıtylǵan bastamalardy talqylaýǵa arnalǵan QHA keńesiniń otyrysynda.

 «Ár bılik aýysqan kezde is nasyrǵa shaýyp, soǵys bolyp jatqan elder bar. Sondyqtan, sondaı bolmasyn dep, Elbasy biraz laýazymdy ózine aldy da, elimizdiń qaýipsizdigin, memleketimizdiń turaqtylyǵyn qamtamasyz etý úshin osyndaı qadamdarǵa bardy. Endi Prezıdent saılandy. Halyqtyń mandatyna ıe boldy. Basshy bireý bolýy kerek, qalǵanymyz qosshy bolýymyz kerek degendi baıaǵydan aıtyp júrmiz. Bıliktiń shashyrańqy bolǵany durys emes dep oılaımyn. Bılikti bir jerge shoǵyrlandyrý kerek. Bılik bir jerge shoǵyrlanǵan kezde Prezıdent myqty bolady. 2-3-ke bóliner bolsa, qadir-qasıet bolmaıdy. Biz osyǵan mán berýimiz kerek. Halyq bárin kórip otyr. Jastar da, sheteldegiler de baıqap otyr», - dedi Ádil Ahmetov.

Ol óz sózinde qaýipsizdikti saqtaý úshin jasalǵan qadamdar qaıtyp ornyna kelip, mandatyn alǵan Prezıdentke bıliktiń tolyq kóshýi kerektigin atap ótti.

«Sonda halyqta ekiudaılyq bolmaıdy. Sonda halyq bılikti syılaıtyn bolady. Bılik bólek turatyn bolsa, ondaı bılikti halyq syılamaıdy. Osyǵan biz qatty mańyz berýimiz kerek. Qasym-Jomart Kemeluly dıplomat adam. Onyń árbir sóziniń astary bar. Biz sol astardy túsinýimiz kerek. Parlament te, Úkimet te myqty bolýy tıis», - dedi ol.

Ádil Ahmetovtiń aıtýynsha, memlekettik qyzmetke qadirli adamdar barýy kerek.

«Sonda ǵana el durys damıtyn bolady. Prezıdenttiń sózinde osyndaı astar bar. Sondyqtan, Prezıdenttiń sózi - baǵdarlamalyq baıandama. Bári de adamı faktorǵa baılanysty. Ádilet bolmaǵan jerde eshqandaı bereke bolmaıdy. Biz ınternet pen aqparattyq tehnologııanyń damyǵan zamanynda ómir súrip otyrmyz. Árbir mınıstr, árbir bılik basyndaǵy azamat áleýmettik jelidegi bolyp jatqan dúnıeni bilmese, ol durys sheshim qabyldaı almaıdy. Óıtkeni, áleýmettik jeli - barometr. Halyqtyń ishinde ne bolyp jatqanyn áleýmettik jeliden kórip otyrmyz. Másele sonda.  Baıandamanyń negizgi maqsaty osy. Sabaqtastyq bolǵany óte durys. Elbasynyń ózi aıtty. Sabaqtastyqty jalǵastyryp, buryn qabyldanǵan baǵdarlamalardy oryndaý úshin jańaǵy prıntsıpter oryndalýy kerek», - dedi Ádil Ahmetov.