«Adidas» krossovkasyn kıgen mońǵol mýmııasynyń jasy anyqtaldy
ASTANA. QazAqparat - Mońǵolııada tabylǵan áıeldiń mýmııasy IX-X ǵasyrdaǵy Qyrǵyz qaǵanatyna tıesili, dep habarlaıdy ca-news.org Gogo-ǵa silteme jasap.
Mońǵol arheologtary batys Mańǵolııanyń Bort bagıın Úzúúrt gıalan ólkesinde júrgizgen qazba jumystary barysynda áıeldiń súıegin tapty. Mońǵol jáne túrik zertteýshileriniń toby tabylǵan zattyń 9 túrli úlgisin alyp, saraptama jasaý úshin AQSh-qa jiberdi.
Saraptama nátıjesi boıynsha, kıizge oralyp, mýmııaǵa aınaldyrylǵan adamnyń denesi IX-X ǵasyrdaǵy Qyrǵyz qaǵanatyna tıesili.
Sonymen qatar, arheologtar ejelgi qabyrdan 40-tan astam artefakt: er-toqym, júgen, balshyqtan jasalǵan qumyra, aǵash tostaǵan, astaý, temir qazan, jylqynyń tutas qaldyqtaryn tapty. Arheologtar osy jerden jastyqtardy, qoıdyń basy men tutas qabyrǵasy salynǵan kıizden jasalǵan jol sómkeni, eshkiniń súıekteri men tostaǵanǵa arnalǵan shaǵyn teri sómkesin tapty. 
Hovd aımaǵy murajaıynyń mamany B.Súhbaatar habarlaǵandaı, mýmııalanǵan áıel aqsúıekter otbasynan emes, qarapaıym halyqtyń arasynan shyqqan. Sebebi, ol jibek matadan tigilgen kıimder kımegen.
Aıta keteıik, mýmııanyń aıaǵynda bolǵan aıaq-kıimdi jeli qoldanýshylary «Adıdas» fırmasynyń krossovkasyna uqsatqan edi.
