Adidas Germanııa fýtbol komandasynyń formasyndaǵy 44 nómirinen bas tartty

ASTANA.KAZINFORM - Adidas fýtboldan Germanııa ulttyq quramasynyń kıimindegi daýly nómir dızaınynan bas tartýǵa sheshim qabyldady. Ol - «44» nómirli fýtbolka. Tsıfr dızaıny tyıym salynǵan «SS» tańbalaryna uqsas.

Ekinshi dúnıejúzilik soǵys aıaqtalǵannan keıin Germanııada natsıstik uıymdar men olardyń rámizderine tyıym salyndy. «SS» (SS abbrevıatýrasy) Schutzstaffel — 1933-1946 jyldary Germanııadaǵy «qaýipsizdik bólimsheleri» — Ulttyq sotsıalıstik nemis jumysshy partııasynyń (NSDAP) áskerılendirilgen kúshteri boldy.

«44» nómiriniń dızaıny atalǵan sımvolǵa uqsaıtyn bolyp shyqty. Osydan keıin Germanııa quramasynyń birde-bir oıynshysy bul nómirdi taqpaıdy degen sheshim qabyldandy. Osylaısha, Eýropa chempıonatynda Germanııa quramasynyń quramynda «1» — den «23» — ke deıingi nómirler bolady.

Al, Bild basylymy Adidas ınternet-dúkeni tutynýshylarǵa fýtbolkalardy ózderiniń aty men nómirimen jekelendirýge múmkindik beretinin atap ótti.

Adidas ınternet-dúkeninde «Lıder» nemese «Gıtler» sııaqty natsıstik termınderdi qoldanýǵa tyıym salynǵan, sebebi olar Adidas jekelendirý nusqaýlaryna sáıkes kelmeıdi.

«Alaıda, klıentter Gebbels (Gıtler kezindegi natsıstik rejımniń úgit-nasıhat mınıstri) nemese Gerıng (Gıtler kezindegi ekonomıka mınıstri) sııaqty famılııalardy tańdaı alady», — dep jazady nemis basylymy.