Adidas dopıng daýyna baılanysty IAAF-pen demeýshilik kelisimsharttaryn buzdy
ASTANA. QazAqparat - Sport kıimderin shyǵaratyn Adidas kompanııasy dopıng daýyna baılanysty Halyqaralyq jeńil atletıka federatsııalary qaýymdastyǵymen (IAAF) jasalǵan qomaqty somanyń demeýshilik kelisimshartyn buzýǵa sheshim qabyldady.
Bı-Bı-Sı agenttiginiń habarlaýynsha, 11 jylǵa eseptelgen kelisimshart merzimi 2019 jyly bitýi tıis, alaıda Adidas ony úsh jyl erte aıaqtaýǵa sheshim qabyldady.
Mámileniń quny keminde 33 mln dollar, ony buzý IAAF-ty qomaqty shyǵynǵa ákelip soqtyrady.
Bul oqıǵa boıynsha Adidas men IAAF-tan resmı túsinikteme berilgen joq.
Adidas Halyqaralyq jeńil atletıka federatsııalary qaýymdastyǵynyń iri demeýshisi bolǵan. Kelisimsharttyń merziminen buryn buzylýyna reseılik jeńil atletıka federatsııasyna qatysty dopıng daýy sebepshi bolǵan. Agenttiktiń aqparat berýshi kózi solaı dep atap ótken.
Sondaı-aq, Búkilálemdik dopıngke qarsy agenttik (WADA) qańtar aıynda IAAF-tyń burynǵy basshysy Lamın Dıaktiń kezindegi jemqorlyq týraly esebin jarııalaǵan edi.
