Ádepsiz kontent jazasy – 5 táýlik: Dárethanada vıdeo túsirgen elordalyqtar jaýapqa tartyldy
ASTANA. KAZINFORM – Elordalyq polıtsııa qoǵamdyq tártipti buzýǵa qatysty quqyq buzýshylyqtarmen júıeli túrde kúres júrgizip keledi. Osy rette quqyq qorǵaý organdary áleýmettik jelide qaralym jınaý maqsatynda qalalyq saıabaqtardyń birindegi qoǵamdyq dárethanada quqyq buzýshylyq jasaǵan jastardy anyqtap, jaýapqa tartty, dep habarlaıdy Astana ákimdiginiń resmı saıty qalalyq Polıtsııa departamentine silteme jasap.
Áleýmettik jelilerge júrgizilgen monıtorıng barysynda polıtsııa qyzmetkerleri elordadaǵy saıabaqtardyń biriniń qoǵamdyq dárethanasynda túsirilgen beınejazbany anyqtady.
Nátıjesinde beınejazbanyń avtory men oǵan qatysqan azamattardyń 20 jáne 22 jastaǵy qala turǵyndary ekeni belgili boldy.
Tekserý barysynda jastardyń áleýmettik jeli qoldanýshylarynyń nazaryn aýdaryp, kontent túsirý úshin dárethana kabınasyndaǵy áınekti kúńgirttendirý fýnktsııasyn ádeıi qospaǵany anyqtaldy.
Ekeýi de ákimshilik jaýapqa tartyldy. Sot sheshimimen olardyń árqaısysyna 5 táýlik merzimge ákimshilik qamaýǵa alý jazasy taǵaıyndaldy.
Polıtsııa ınternettegi tanymaldyqqa umtylý qoǵamdyq tártipti buzýǵa sebep bolmaýy tıis ekenin eske salyp, azamattardy qoǵamdyq oryndarda da, ınternet keńistiginde de minez-qulyq normalaryn saqtaýǵa shaqyrady.
Eske salsaq, osyǵan deıin polıtsııa terek mamyǵyn órtegender jaýapqa tartylatynyn eskertkenin jazǵanbyz.
