Ádep keńesi Pavlodar oblystyq DSB basshysynyń orynbasaryn qyzmetinen bosatýdy usyndy
PAVLODAR. QazAqparat - Pavlodar oblystyq densaýlyq saqtaý basqarmasy basshysynyń orynbasary Erlan Erjanov 1,8 mlrd teńgelik medıtsınalyq tehnıkany satyp alýǵa arnalǵan tenderdi zańsyz túrde toqtatyp tastaǵan, dep habarlaıdy QazAqparat tilshisi QR Memlekettik qyzmet isteri agenttiginiń Pavlodar oblysy boıynsha departamentiniń baspasóz qyzmetine silteme jasap.
«Laýazymdy qyzmetinen bosatý - kezekti otyrysta Ádep keńesi oblystyq densaýlyq saqtaý basqarmasy basshysynyń orynbasary Erlan Erjanovqa qatysty osyndaı sheshim shyǵardy», - dep habarlaıdy departament ókilderi.
Tártiptik is materıaldaryna súıensek, Erlan Erjanov quny 1,8 mıllıard teńgelik medıtsınalyq tehnıkany satyp alý boıynsha tenderdi zańsyz túrde toqtatqan.
«Tender jarııalanǵannan keıin zańbuzýshylyqtar jóninde densaýlyq saqtaý basqarmasyna eki ótinim kelip túsken. Olardyń ótinishterine berilgen jaýap boıynsha densaýlyq saqtaý basqarmasy konkýrstyq qujattamany qoldanystaǵy zańnamaǵa sáıkes keltirgen. Osyǵan baılanysty dári-dármekter men medıtsınalyq maqsattaǵy buıymdardy uıymdastyrý jáne satyp alý erejelerine sáıkes, tender ótkizýge eshqandaı shekteýler bolmaýy kerek edi», - dedi departamenttiń bas mamany.
Erlan Erjanovtyń aıtýynsha, Pavlodar oblysy ákiminiń keńesshisi bul tenderden bas tartyp, oǵan medıtsınalyq qurylǵylardyń tizimi engizilgen flesh-kartany bergen.
«Erjanov Erlan Kenjebaıuly flesh-kartada kórsetilgen medıtsınalyq qurylǵylardyń tizimin zerttep, olardyń konkýrsta jarııalanǵan medıtsınalyq tehnıkanyń tizimine sáıkes kelmeýine baılanysty konkýrsqa ózgertýler engizýden bas tartqan. Sonymen birge, Erjanov ereje talaptaryn buzyp, tenderdi negizsiz toqtatqan. Memlekettik satyp alý saıtynda tenderdiń toqtatylǵanyn jarııalaǵan. Degenmen densaýlyq saqtaý basqarmasynyń memlekettik satyp alý bóliminiń basshysy konkýrstyń toqtatylǵany týraly eshqandaı uıǵarym jazbaı, bári zańǵa sáıkes jasalǵanyn alǵa tartqan» , - delingen habarlamada.
Osyǵan qaramastan, Erlan Erjanov tenderdiń kúshin joıý týraly buıryq bermeı-aq ony toqtatyp tastaǵan. Sonymen qatar, tenderdi boldyrmaýdyń sebepterin túsindiretin jadynama da bolmaǵan. 4 qyrkúıektegi sotqa deıingi tergeý barysynda sybaılas jemqorlyqpen kúres qyzmetiniń memlekettik aýdıtorynyń qorytyndysyna sáıkes, Erjanov qol qoıǵan jáne oblystyq densaýlyq saqtaý basqarmasynyń saıtynda jarııalanǵan habarlama negizinde bul tenderdi joıý zańsyz bolyp tanyldy.
«19 tamyzda Erlan Erjanov densaýlyǵyna baılanysty demalysqa ketken. Osylaısha, oblystyq densaýlyq saqtaý basqarmasy basshysynyń mindeti onyń orynbasary Sáýle Eskendirqyzy Arystanovaǵa júkteldi. Osydan keıin Amanolla Qozybaev Arystanovaǵa medıtsınalyq jabdyqtardyń tizimin jáne olarǵa arnalǵan tehnıkalyq sıpattamalardy qamtıtyn flesh-kartany usynady. Alaıda 31 tamyzda sybaılas jemqorlyqpen kúres qyzmetiniń qyzmetkerleri medıtsınalyq jabdyqtar men olardyń tehnıkalyq málimetteri týraly burmalanǵan málimetterdi tenderlik qujattamaǵa engize otyryp, densaýlyq saqtaý basqarmasy men oblys ákimdiginiń laýazymdy tulǵalarynyń zańsyz áreketiniń jolyn kesken», - dep habarlady departamentten.
Sonymen qatar, hatshylyqtyń bastamasy boıynsha Pavlodar oblysynyń taýarlar men qyzmetterdiń sapasyn, qaýipsizdigin baqylaý departamenti Erlan Erjanovtyń naýqastyq demalysta negizdi túrde shyǵýyna tekserý júrgizdi.
«Osylaısha, Erjanov Erlan Kenjebaıulynyń tártiptik teris qylyǵy men Eńbek kodeksiniń babyn buzǵany belgili boldy. Eńbek kodeksiniń 52-baby birinshi pýnktine sáıkes, jumys berýshi qyzmetkerdiń jumysta sebepsiz bolmaýyna baılanysty kelisimshartty buza alady», - delingen habarlamada.
