Ádep boıynsha júrgizilgen saýalnama: Densaýlyq saqtaý salasy kósh sońynda

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmetshilerdiń ádebi boıynsha qazaqstandyqtarmen júrgizilgen saýalnamanyń nátıjesin jarııalady, dep habarlaıdy «QazAqparat» HAA tilshisi.

«Kúndelikti ómirde memlekettik qyzmetshilerdiń túsinigi men qundylyqtaryn ózgertý júıesi boıynsha máseleler sheshilmeı jatyr. Máselen, memlekettik qyzmettegi etıkaǵa baǵa berý boıynsha júrgizilgen áleýmettik zertteýlerdiń nátıjesi azamattardyń 26 paıyzy bul jaıǵa jaǵymsyz kózqarasta ekenin kórsetken», - deıdi atalmysh agenttiktiń memlekettik qyzmet salasyn baqylaý departamenti dırektorynyń orynbasary Ravıl Tólebaev Densaýlyq saqtaý mınıstrliginde ótken keńes barysynda.

Onyń aıtýyna qaraǵanda, saýalnama barysynda azamattar bıýrokratııa men etıkadan tys jaǵdaılar týraly aıtqan.

«Memlekettik qyzmetshilerdiń ádeptilik reıtıngine sáıkes, halyqtyń oıynsha, densaýlyq saqtaý salasy baǵyty 10 baldyń 6,19-yn alǵan. Osylaısha, densaýlyq saqtaý salasyndaǵylar reıtıngte sońǵy orynnan kórinip otyr», - deıdi ol.

Dese de, departament dırektorynyń orynbasary bul jaǵdaıǵa tómen aılyq, jumystyń kóptigi men ózge de faktorlar áser etip otyrǵanyn aıtady.

«Osyǵan baılanysty biz birneshe tájirıbelik bastama ázirledik. Osy jyldan bastap agenttik memlekettik qyzmetshilerdiń quqyǵyna baqylaý jasaıtyn bolady», - dep túıdi Tólebaev.