Ademi «Jańa tolqyn-2015» úshinshi kúniniń qorytyndysy boıynsha ekinshi oryn aldy (FOTO, VIDEO)
ALMATY. QazAqparat - Keshe Sochı qalasynda «Jańa tolqyn-2015» sońǵy baıqaý kúni ótti.
Eske sala keteıik, bıyl Qazaqstannyń namysyn eki qatysýshy: ánshi Ademi jáne VoiceKZ toby qorǵady.
Jas ánshiler baıqaýynyń qorytyndysy boıynsha qazaqstandyq ánshi Ademi úzdik úshtikke enip, ındonezııalyq ánshi Millane Fernandez ekinshi oryndy bólisti. Ekeýi de úsh kúnde 279 upaı jıǵan, al VoiceKZ kvarteti 271 upaımen reıtıngte úshinshi orynnan segizinshige tústi. Úsh kúnde de baıqaýda horvatııalyq Damir Kedzo kósh bastady.
Atap ótý kerek, bul keshte Ademi Batyrhan Shúkenovtiń qurmetine arnalǵan ándi oryndady.
Baıqaý qorytyndysy men oǵan qatysýshylardy marapattaý 11 qazanda «Rossııa 1» telearnasynyń tikeleı efırinen kórsetiledi.
Ademi, shyn aty jóni Dınara Qaırova, Almaty turǵyny - halyqaralyq qatynastar jáne halyqaralyq týrızm salasyndaǵy joǵary bilikti maman. Varnadaǵy (Bolgarııa), Reseıdegi («Reseı juldyzy»), Ispanııadaǵy halyqaralyq mýzykalyq baıqaý laýreaty, Sochıdegi «Eýropa úmiti» halyqaralyq mýzykalyq baıqaýynyń ekinshi syılyǵynyń laýreaty. Malta, Avstrııa, Germanııa, Italııa jáne Chehııadaǵy túrli halyqaralyq mýzykalyq festıvalderge qatysqan.
