Ádemi qyzǵa telefonyn sóılesýge bergen taldyqorǵandyqtar san soǵyp qaldy
TALDYQORǴAN. QazAqparat - Taldyqorǵanda alaıaqtyq jasady degen kúdikpen 21 jastaǵy boıjetken ustaldy. Ol óziniń kórikti kelbetin paıdalaný arqyly er azamattardyń qymbat uıaly telefondaryn qoldy etip otyrǵan, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, alaıaq qyzdan jábir kórdik degenderdiń barlyǵy er adamdar. Qazir qamaýda otyrǵan 21 jastaǵy turǵynnyń 4 alaıaqtyq qylmysqa qatysy bar ekeni dáleldengen.
«Kúdikti óziniń áreketin adamdar kóp shoǵyrlanǵan jerlerde iske asyrǵan. Ol er azamattardyń janyna kelip, uıaly telefonymen qońyraý shalýǵa ruqsat surap, artynsha kópshiliktiń arasyna jasyrynyp qalǵan. Al onyń kórikti kelbeti qandaı da bir kúdik týdyrmaǵan», - dep málim etti vedomstva ókilderi.
Qazir kúdiktiniń ústinen QR QK-niń 190-baby boıynsha is qozǵalyp, sotqa deıin tergeý júrip jatyr. Qylmystyq is Taldyqorǵan qalasynyń ІІB-i qyzmetkerleriniń óndirisinde.
