«Ádemi» kólik nómirlerine resmı tarıfter belgilendi
ASTANA. 3 mamyr. QazAqparat - QR ІІM Jol polıtsııasy komıteti avtomobılshilerge «ádemi» nómirlerdi resmı satý máselesin kóterip otyr.
Bul rette, qalaǵan árbir adam este saqtalatyn sandar men áripterdi zańdy túrde satyp ala alady. Armandaǵy qańyltyrlarǵa tarıfter resmı belgilendi. Bul týraly 3 mamyrdaǵy №77 (17435) sanynda «Ekspress K» gazeti jazady.
Kózge túser «beldi» nómirleri bar avtomobılder bizdiń joldarymyzda kóptep kezdesedi. Baqytty 777 nemese birinshi jáne sońǵy sandary birdeı «aına» nómirler - júrgizýshini ózinshe erekshelendirip turady. «Mundaı baqytty qaıdan aldyńyz?», - degen suraqqa kólik ıeleri: «Sáttilik...»,- dep jymyńdaı jaýap qaıyrady. Nege ekeni belgisiz, qazirgi ýaqytta sáttilik kóbine qymbat kólikterdiń ıelerine jıi jolyǵatyn boldy.
Jol polıtsııasy komıteti tirkeý-emtıhan tapsyrý jumysyn uıymdastyrý bóliminiń bastyǵy Bahytjan Baltashevtiń málimetinshe, memlekettik nómirlerdiń eki sanaty anyqtaldy: erekshe jáne kóbirek suranysqa ıeler. Bul sanattar boıynsha qatań baǵalar belgilendi: 1,5 myń dollardan 2,5 myń dollarǵa deıin.
Onyń aıtýynsha, mundaı jańashyldyqtar Úkimet qaraýyna berilgen «Jol qozǵalysy týraly» zań jobasynda qarastyrǵan. Jobanyń avtorlary erekshe sanatqa 001, 002, 003, 004, 005, 006, 007, 008, 009 nómirlerin jatqyzdy. Kóbirek suranysqa ıe nómirler arasynda 100, 200, 300, 400, 500, 600, 700, 800, 900, sondaı-aq 111, 222, 333, 444, 555, 666, 777, 888, 999 bar.
