«Ádemi-aı» óner mýzeıi Qushan patshalyǵy kezindegi jádigerlerdi kórmege shyǵardy (FOTO)
ASTANA. QazAqparat - Búgin Ulttyq mýzeıde «Ádemi-aı» óner mýzeıiniń «Zergerlik óner» atty kórmesi ashyldy.
Qazaq handyǵynyń 550 jyldyǵyna arnalǵan kórmedegi eń kóne jádigerlerdiń biri - Qushan patshylyǵy kezindegi Kanıshka patshanyń beınesi bar tıyndar eken.
«Ádemi-aı» óner mýzeıinde jalpy myńnan asa kollektsııasy bar. Al búgin Qazaq handyǵynyń 550 jyldyǵyna oraı osy jádigerler arasynan Qazaq handyǵy dáýirinen syr shertetin buıymdardy kórmege shyǵardyq. «Zergerlik óner» atty búgingi kórme «zergerlik buıymdar», «kóshpendi qazaqtyń turmystyq buıymdary» sııaqty toptarǵa bólinip otyr. Zattarymnyń kóbi - zergerlik buıymdar. Olardyń arasynda umyt bolyp bara jatqan qus tumsyq júzikter, topsaly bilezikter, asyl tastar qondyrǵan boıtumarlar, shashpaýlar men sholpylar, aısyrǵa, qojaly syrǵa sııaqty syrǵanyń 100-den astam túri, er adamdardyń beldikteri, óte jaqsy kúıinde saqtalǵan er turmandar, qamshylar, kıiz úı jabdyqtary bar»,-deıdi «Ádemi-aı» óner mýzeıiniń negizin qalaǵan ónertanýshy Bahargúl Tólegen.
B.Tólegen atap ótkendeı, kórmedegi eń kóne jádigerdiń biri - Qushan patshalyǵy kezindegi Kanıshka patshanyń beınesi bar teńgeler.
«Kóne jádigerlerdiń arasynan b.z.b. 1-3 ǵasyrlardaǵy kóne memleket - Qushan patshalyǵy kezindegi Kanıshka patshanyń beınesi bar teńgelerdi erekshe ataýǵa bolady. Sondaı-aq, 3-5 ǵasyrlardaǵy qarýlar, 11-12 ǵasyrlardaǵy Otyrar keramıkalary da osy kórmeniń sánin ashyp, mazmunyn tolyqtyryp tur»,-deıdi B.Tólegen.
Aıta keteıik, Qushan patshalyǵy - kóne zamandaǵy memleket. Órkendep turǵan kezinde (b.z.b. 1 ǵasyrdyń aıaǵy - 3 ǵasyrdyń basy) qazirgi Orta Azııanyń edáýir bóligin, Aýǵanstandy, Batys Pákistandy, Soltústik Úndistandy, Shyǵys Túrkistandy (qytaı jaýlap alǵannan keıin Smn Tszıan atalǵan) túgel qamtyǵan. Rımdik parfııa, Han memleketimen qatar kóne zamandaǵy 4 kúshti ımperııanyń biri boldy. Kóne dúnıede zor ról atqarǵandyǵyna qaramastan, Qushan patshalyǵynyń tarıhy jetkilikti zerttelmegen. Qushan patshalyǵy saıası tarıhy jaıyndaǵy derekter Qytaı men Rım avtorlarynyń jazbalarynan, Qushan jerinde shyǵarylǵan teńge aqshalarǵa júrgizilgen taldaýlardan, túrli zattardyń betinde saqtalǵan azdaǵan jazýlardan qalyptasady. Qushan tarıhynynyń dál hronologııasy áli anyqtalmaǵan.
