Ádemi ári qaýipti kórinis: Gırlıanda men petardany qalaı durys jaǵýǵa bolady

NUR-SULTAN. QazAqparat – Otshashý men salıýt atý ádemi kórinedi, alaıda olar qaýipti. Al shyrshalar, ásirese jasandylary tez janýǵa beıim. Elordalyq qutqarýshylar azamattarǵa petarda atý jáne ıllıýmınatsııa ornatý kezindegi qaýip-qater týraly eskertedi, dep habarlaıdy QazAqparat Nur-Sultan qalasy TJD baspasóz qyzmetine silteme jasap.

Jańajyldyq shyrsha turaqty negizde ornatylýy jáne úıden shyǵýǵa kedergi keltirmeýi tıis, al onyń butaqtary qabyrǵalar men tóbelerden keminde 1 metr qashyqtyqta, jylytý aspaptarynan alys bolýy kerek.

Tek sáıkestik sertıfıkaty bar elektr gırlıandalary men ıllıýmınatsııalardy satyp alyńyz. Gırlıandany tańdaǵanda, qýaty azdaýyn alýǵa tyrysyńyz.

Sebebi, shamdardyń qýaty neǵurlym az bolsa, olar shyǵaratyn jylý soǵurlym az bolady, demek, órt qaýpi de tómen.

Illıýmınatsııa nemese gırlıandada aqaý shyqsa (symdardyń oqshaýlamasynyń qyzýy jáne zaqymdanýy, ushqyndaý jáne basqa), ony dereý toq kózinen ajyratyńyz.

Eger úıden shyǵyp bara jatsańyz nemese uıyqtamaq bolsańyz, gırlıandany eshqashan qosýly qaldyrmańyz.

Balalarǵa úlkenderdiń qaraýynsyz shyrsha janynda bengal shamdaryn jaǵýǵa jáne shartyldaqtardy paıdalanýǵa ruqsat etpeńiz.

Shyrshany bezendirý maqsatynda janyp turǵan shamdardy paıdalanbańyz.

Pırotehnıkalyq buıymdardy úı ishinde paıdalanýdan múldem bas tartyńyz.

BІLE JÚRІŃІZ:

• eger biltesi kúıip nemese janyp ketse, al otshashý atylmasa:

• onda byqsyp turatyn bólikteri joq ekenine kóz jetkizý úshin otshashýǵa (petardaǵa) jaqyndamańyz;

• otshashýdyń (petardanyń) jarylmaıtynyna kóz jetkizý úshin keminde 10 mınýt kútý kerek;

• eshbir jaǵdaıda otshashýdyń (petardanyń) ústinen eńkeıip qaraýǵa bolmaıdy, barlyq áreketti qolsozym jerden jasaǵan jón.

ESTE SAQTAŃYZ:

Pırotehnıkany jylytý aspaptarynyń (batareıalardyń, gaz jáne elektr plıtalarynyń jáne t.b.) janynda saqtaýǵa, tutanǵysh buıymdardy shalbar, kóılek jáne pıdjak qaltalaryna salýǵa bolmaıdy.

Pırotehnıkany atý úshin iske qosýshy sanaýly sekýndta qaýipsiz qashyqtyqqa (bul keminde 10-15 metr) ketýi tıis.

Pırotehnıkalyq buıymdy iske qosý kezinde nusqaýlyqta kórsetilgen radıýsta aǵashtar, turǵyn úıler, basqa da qurylystar joq ekenine kóz jetkizý qajet.

TYIYM SALYNADY:

petarda, otshashý, salıýtterdi jáne basqa da buıymdardy úı ishinde, balkondar men lodjııalardan, turǵyn jáne sharýashylyq qurylystardyń, jańa jyldyq shyrshalardyń janynda ushyrýǵa tyıym salynady.

Balalar men jasóspirimderge tek úlkenderdiń baqylaýymen otshashýlardy, petardalardy, túrli zymyrandardy iske qosýǵa, shartyldaqtardy atýǵa, bengal ottaryn jaǵýǵa bolady.

Ózińizge jáne aınalańyzdaǵy adamdarǵa qaýip tóndirmeńiz! Eger jazataıym oqıǵa oryn alsa, dereý «101» telefonyna habarlasyńyz.