Ádemi, Sulý jáne Ámire: Aqtóbede úshem ómirge keldi
AQTÓBE. KAZINFORM — Shalqar qalasyndaǵy Laıyqovtar otbasynda ómirge kelgen sábılerdi aýdan ákimi quttyqtap bardy. Olar bir aıdan asa ýaqyt Aqtóbe qalasyndaǵy perzenthana dárigerleriniń baqylaýynda boldy.
Erli-zaıypty Aslan Laıyqov pen Lázzat Jolamanovanyń otbasynda úlken qýanysh. Shalqar qalasynyń turǵyny Lázzat Jolamanova júktiliginiń otyz birinshi aptasynda úshemdi ómirge ákeldi. Nárestelerdiń dúnıege kelgendegi salmaǵy — 1600, 1670, 1490 gramm boldy.
— Sábılerim bir aı buryn ómirge keldi. Alaıda salmaǵy óte kishkentaı bolyp, biriniń júregi aýyryp, ota jasaýǵa týraly keldi. Sondyqtan jan-jaqqa habar bermeı, keshe ǵana aýdandaǵy úıimizge oraldyq. Qazir nárestelerdiń jaǵdaıy jaqsy, salmaq jınap, ósip keledi. Negizi óz tuqymymda egizder bar. Sonymen birge úlken ulym «úsh bópe kerek» dep aıtyp júr edi. Aýzyna salǵany shyǵar. Balalarymyzǵa esim bergen kezde kúıeýim ekeýimiz aqyldasyp qoıdyq. Ómiri ádemi, ǵumyry sulý ári Allanyń ámirimen kelgen balalar dep úndestirdik. Ózim bala kútimimen úıdemin, al kúıeýim temirjol salasyndaǵy kúzet qyzmetinde, — dedi jas ana Lázzat Jolamanova.
Onyń aıtýynsha, qazirgi úıi eski ári tarlyq etedi.
Aıta keteıik, sábılerdiń ata-anasyn aýdan ákimi Janbolat Jıdehanov quttyqtap baryp, estelik syılyǵyn tartý etti.
Buǵan deıin habarlaǵanymyzdaı, qazanda 23 jastaǵy qyzylordalyq dúnıege úshem ákeldi. Olardyń esimi — Hadııa, Hafız, Hamza.