«Ádemi» nómirlerge onlaın tapsyrys berýge bolady

ASTANA. KAZINFORM — «TsON» mobıldi qosymshasynda jańa tsıfrlyq qyzmet iske qosylǵanyn habarlady. Endi qazaqstandyqtar avtokólikke arnalǵan memlekettik nómirdi onlaın tańdap, tapsyrys bere alady. 

«Azamattarǵa arnalǵan úkimet» memlekettik korporatsııasynyń málimetinshe 2026 jyldyń 1 qańtarynan bastap Salyq kodeksine ózgerister engizilip, kólik quraldarynyń memlekettik tirkeý nómirlik belgileriniń túrleri keńeıdi.

— Azamattardyń «ádemi» nómirlerge degen qyzyǵýshylyǵynyń artýyna jáne kólik tirkeý barysynda nómirlik belgini tańdaýǵa degen qajettilikterdiń týyndaýyna baılanysty bul tizimde «qalaýly» nómirler nemese birinshi jáne sońǵy sandary birdeı «aına» nómirler de bar, — delingen habarlamada.

Osyǵan baılanysty qyzmettiń qoljetimdiligin arttyrý maqsatynda avtokólik nómirlerin «TsON» mobıldi qosymshasy arqyly qashyqtan tańdaý jáne tapsyrys berý múmkindigi iske asyryldy.

Jańa tsıfrlyq qyzmet MHQKO-larǵa jeke barmaı-aq, memlekettik nómirge onlaın ótinim berý múmkindigin usynady.

— Ótinimdi rásimdeý tolyqtaı onlaın formatta júzege asyrylady jáne birneshe mınýtty ǵana alady. Qoldanýshy «TsON» mobıldi qosymshasyna kirip, avtorızatsııadan ótip, «Memlekettik nómirge tapsyrys berý» qyzmetin tańdaıdy. Odan keıin qalaǵan serııasy men nómir kombınatsııasyn engizedi. Óńir avtomatty túrde azamattyń tirkelgen mekenjaıyna sáıkes anyqtalady.

Nómirlik belgi bos bolǵan jaǵdaıda ótinim berýshi tólem jasap, daıyn nómirlik belgini alý úshin yńǵaıly bólimsheni tańdaı alady. Tańdalǵan nómir bos emes bolsa, júıe bul týraly habarlap, basqa nusqany engizýdi usynady, — delingen habarlamada.

Qyzmet Іshki ister mınıstrliginiń aqparattyq júıelerimen ıntegratsııalanǵan.

Bul tańdalǵan memlekettik nómirdiń bos nemese bos emestigin birden tekserýge múmkindik beredi. Júıe engizilgen nómir kombınatsııasynyń mártebesin avtomatty túrde kórsetedi.

Aıta ketelik Mańǵystaýda ótken jyly kólik ıeleri VIP nomer satyp alýǵa 116 mln teńge jumsaǵan.