«Ádebıet portaly» «Qazaqtyń birligin tý etken qos batyr!» atty jyr báıgesin jarııalady
ASTANA. QazAqparat - "Ádebıet portaly" "Qazaqtyń birligin tý etken qos batyr!" atty jyr báıgesin jarııalaıdy.
WBK tujyrymy boıynsha Qytaıda ótken erejesiz jekpe-jekten halyqaralyq chempıonattyń fınalyna joldama alǵan qos qazaq - qazaqstandyq Aıbek Nurseıit pen qytaı qazaǵy Ǵabıt Tursynbek bir-birine judyryq jumsamaǵany úshin tóreshilerden eskertý alyp, jarystan shyǵaryldy. Degenmen ekeýiniń márttigi men baýyrmaldyǵy áleýmettik jelide úlken jańǵyryq týǵyzyp, halyqtyń ystyq yqylasyna bólendi. Aqyn, aýdarmashy, ádebıettanýshy Júkel Hamaı qos batyrǵa jyr arnap, el júregin odan ári eljiretti. "Ádebıet portaly" osy úrdisti jandandyryp, qazaqtyń barsha aqyndaryna "Qazaqtyń birligin tý etken qos batyr!" atty jyr báıge jarııalaıdy!
Aıbek pen Ǵabıttiń erligine arnalǵan jyr dodasyna qatysamyn deýshiler óleńderin portaldyń elektrondy poshtasyna (adebiportal@gmail.com) jibere alady. Ulystyń Uly kúni qarsańynda báıge qorytyndysy shyǵarylyp, eń úzdik úsh óleńge arnaıy syılyqtar beriledi»,- delingen portal aqparatynda.
