«Ádebıet portaly» - kásibı aqyn-jazýshylar men jas avtorlar úshin biregeı kommýnıkatsııalyq ádebı alań - N. Áshim

ASTANA. 25 jeltoqsan. QazAqparat - «Ádebıet portaly» tek onlaın kitaphana retinde ǵana emes, kásibı aqyn-jazýshylar men jas avtorlar úshin de biregeı kommýnıkatsııalyq ádebı alań bolyp tabylady. Bul týraly búgin Astanada ótken «Ádebıet portalynyń» tusaýkeser rásiminde «Qazkontent» AQ Basqarma tóraǵasynyń orynbasary Nartaı Áshim málimdedi.

Onyń aıtýynsha, jas avtorlar shyǵarmashylyǵynyń ári qaraı damýyna aqparattyq qoldaý kórsetý men ilgeriletý maqsatynda arnaıy «Jas avtorlar minberi» aıdary qurylǵan.

«Qazaqstandyq jastar shyǵarmashylyǵynyń ózindik damýyn júzege asyrý maqsatynda Portal betinde barlyq zııaly qaýymnyń qyzyǵýshylyǵyn arttyratyn «Ashyq minber» bólimi blog retinde oryn alǵan», - dep atap ótti N. Áshim.

Sondaı-aq, «Aýdarma», «Mazmun», «Hat», «Illıýstratsııa» jáne «Poezııa álemi» jobalary sheńberinde belsendi túrde álemdik shyǵarmalardy qazaq tiline aýdarý jáne qazaq ádebıetin basqa tilderge aýdarý, uly adamdardyń qundy da asyl hattarymen tanysý, tanymal ádebı shyǵarmanyń qysqasha mazmunyn jazý, sonymen qatar, súıikti óleńdi mánerlep oqý men ádebıette ıllıýstratsııany - jańasha bir qyrynan qaraýǵa qol jetkizedi. Sonymen qatar, «Ádebıet portaly» «Balalar ádebıeti» bólimin qolǵa alyp, balalardyń nazarynan tys qalmaýdy maqsat etip otyr.

Budan basqa da Portalda taǵylymdy dáıeksózderdi tabýǵa, ádebı jýrnal oqýǵa, súıikti keıipker jaıynda bilýge jáne mádenıet qaıratkerlerimen, aqyn-jazýshylarmen ótken suhbattardy oqyp, aýdıokitaptar tyńdaýǵa bolady.

«Ádebıet portaly» - ádebıetti joǵary baǵalaıtyn kitap janashyrlary, ıllıýstratsııalaýshylar, baspalar jáne avtorlar múddesin kózdeıtin platforma retinde tanylady. «Ádebıet portaly» osynyń barlyǵyna qol jetkizetin úlken perspektıvalyq onlaın-platformasyna aınalyp otyr», - dep atap ótti N. Áshim.