Ádebıet pishinnen emes, mazmunnan turady - Qabdesh Jumadil
ALMATY. 3 tamyz. QazAqparat /Erlik Erjanuly/ - "Qazir ádebıettiń pishindik jaǵy basymdaý bolyp, mazmuny jeńildep bara jatyr", - dedi Qazaqstannyń halyq jazýshysy, Memlekettik syılyqtyń ıegeri Qabdesh Jumadil búgin Almatyda ótken baspasóz máslıhatynda.
«Ádebıet pishinnen emes, mazmunnan turady. Buryn úlken tarıhı datalarǵa taqyryptyq jospar jasalatyn. Bıyl Abylaı hannyń týǵanynyna 300 jyl toldy. Osyǵan oraı baspalarda qandaı kitap shyǵady degen saýalǵa eshkim jaýap bere almaıdy», - deıdi jazýshy. Onyń aıtýynsha, bul tarıhı oqıǵalar men ult qaıratkerleriniń esimin ulyqtaýǵa jańa múmkindik beredi. Aqparat quraldarynda únemi jazylyp, aıtylyp jatqan soń oqyrman bul týraly keńirek bilgisi kelse arnaıy kitaptardy izdep óz bilimin jetildirýge umtylady. Peıili, yqylasy aýady. Qazir bizde Abylaı degen han bolmaǵandaı jáne ondaı adam ómirde múlde týmaǵandaı jaǵdaıdamyz. Eshkim, eshnárseden habarsyz. Ádebıetti baıytatyn osyndaı úlken datalar men onyń mazmuny. Onsyz eshnárse de jasalmaıdy, eshnárse de ilgeri jyljymaıdy. Taptaýryn taqyryptan alysqa uzap shyǵa almaı, tusaýly attaı júrisimiz kibirtikteı beretin bolady.
