Ádebıet pen óner qaıratkerlerine mádenıet salasyndaǵy memlekettik stıpendııa tapsyryldy
ASTANA. KAZINFORM – Qazaqstan Respýblıkasynyń Memlekettik keńesshisi Erlan Qarın belgili mádenıet jáne óner qaıratkerlerine mádenıet salasyndaǵy memlekettik stıpendııany tabys etti, dep habarlaıdy Aqordanyń baspasóz qyzmeti.
Memlekettik stıpendııa ádebıet pen óner salasyndaǵy 75 adamǵa berildi.
Jyl saıyn taǵaıyndalatyn bul stıpendııa – memlekettiń mádenıet jáne óner qaıratkerlerine, shyǵarmashylyq qyzmetkerlerine jáne jas daryndarǵa qoldaýy men qamqorlyǵynyń aıǵaǵy. Sondaı-aq olardyń ult mádenıetin órkendetip, álemge tanytýǵa qosqan eleýli úlesine kórsetilgen qurmet.
Memlekettik stıpendııa Asanáli Áshimov, Іlııa Jaqanov, Bıbigúl Tólegenova, Nurǵalı Núsipjan, Merýert Ótekeshova, Dýlat Isabekov, Tólen Ábdik, ıÝrıı Aravın, Serjan Shákirat, Amandos Aqanaev, Tatıana Tarskaıa, Gúlver Razıeva sekildi ádebıet pen óner maıtalmandaryna tabystaldy.
Sonymen qatar Kann halyqaralyq festıvaliniń laýreaty Samal Eslámovaǵa, balerına Tatıana Tenge, opera solısi Maqsat Samatovqa jáne ózge de jas daryndarǵa memlekettik qoldaý kórsetildi.
Stıpendııa ıegerleri memlekettiń qarjylaı qoldaýy arqasynda shyǵarmashylyqpen alańsyz aınalysýǵa múmkindik alady. Bul stıpendııa elimizdegi mádenıet jáne óner salasynyń damýyna yqpal etip qana qoımaı, tyń ıdeıalar men jobalardyń iske asýyna septigin tıgizedi.
Osyǵan deıin memlekettik nagradalar júıesine 9 jańa qurmetti ataq engiziletini týraly jazdyq.