Ádebıet pen kitap oqýdyń tsıfrlyq tehnologııalary jobalaryna 50 mln teńge grant bólinedi
ASTANA. KAZINFORM — Ádebıet pen kitap oqýdyń tsıfrlyq tehnologııalary salasyndaǵy 10 qazaqstandyq jobaǵa 50 mln teńge grant bólinedi. Bul týraly Mádenıet jáne aqparat mınıstrligi habarlady.
Kreatıvti ındýstrııalardy damytý qory (Qazaq Creative) otandyq ádebıet, kitap shyǵarý jáne kitap oqýdyń tsıfrlyq tehnologııalary salasyndaǵy startaptar men ınnovatsııalyq jobalarǵa grant bólý konkýrsyn qorytyndylady.
Konkýrsqa barlyǵy 172 ótinim tústi. Іrikteý nátıjesinde 10 joba jeńimpaz atandy. Olardy iske asyrýǵa shamamen 50 mln teńge qarastyrylǵan. Ár jobaǵa 5 mln teńgege deıin grant beriledi.
Qoldaý tapqan bastamalar qatarynda qazaq tilinde kitap oqýǵa arnalǵan tsıfrlyq kitaphanalar men platformalar qurý, balalarǵa arnalǵan kitaptar men komıkster shyǵarý, jasandy ıntellektini qoldana otyryp, ınteraktıvti bilim berý quraldaryn ázirleý jobalary bar.
Atap aıtqanda, «Sóz-Qazyna», Oqiber, «Bir bettik kitap: Qazaq ertegileri», Satti.asia, «Tátti ertegi», Abai Library, «Tulga», Compara jobalary, sondaı-aq qazaqstandyq komıkster toptamasy men «Dombyra úırengim keledi» jobasy granttyq qoldaýǵa ıe boldy.
Bul bastamalar otandyq ádebıettiń qoljetimdiligin arttyrýǵa, qazaq tilindegi sapaly kontentti kóbeıtýge, balalar men jastardyń kitap oqýǵa qyzyǵýshylyǵyn arttyrýǵa, sondaı-aq zamanaýı tsıfrlyq tehnologııalar arqyly ulttyq mádenıetti dáripteýge baǵyttalǵan.
Italııalyq jazýshynyń áıgili shyǵarmasy qazaqshaǵa aýdarylǵanyn jazǵan edik.
