Ádebıet boıynsha Nobel syılyǵyna kanadalyq Elıs Mýnro ıe boldy
ASTANA. 10 qazan. QazAqparat - 2013 jylǵy ádebıet salasyndaǵy Nobel syılyǵyna 82 jastaǵy kanadalyq novellashy Elıs Mýnro ıe boldy, dep habarlady RBK.
Nobel komıteti ony qazirgi zamandaǵy áńgimeniń sheberi dep atady jáne onyń psıhologııalyq realızmmen sıpattalatyn baıandaý mánerin atap ótti.
E.Mýnro ádebıet boıynsha Nobel syılyǵyn ıelengen 13-shi áıel jáne bul nagradanyń 110-shy ıegeri boldy. Ol buǵan deıin Býkerov syılyǵymen jáne úsh ret Kanada gýbernatorynyń syılyǵymen marapattalǵan bolatyn. Psıhologııalyq kúrdeli keıipkerlerdi somdaǵany úshin soltústikamerıkandyq áriptesteri E.Mýnroǵa «Bizdiń Chehov» degen ataq berdi.
Bıyl osy ataqqa japondyq Harýkı Mýrakamı, amerıkandyq Djoıs Kerol Oýts, vengr prozashysy jáne dramatýrgi Peter Nadash, álemniń tanymal dramatýrgi ıÝn Fosse, koreı aqyny Ko Ýn, hıppı qozǵalysynyń sımvoly Bob Dılan jáne basqalary básekege túsken bolatyn.
E.Mýnro 1931 jyly 10 shildede Ontarıo provıntsııasynyń Vıngem qalashyǵynda dúnıege kelgen. Ol jasóspirim kezinen jaza bastaǵan, 1950 jyly Soltústik Ontarıo ýnıversıtetinde oqyp júrgen kezinde «Kóleńke ólshemi» atty alǵashqy áńgimesin jarııalady. Onyń «Baqytty kóleńkeler bıi» atty alǵashqy jınaǵy 1968 jyly Kanada gýbernatorynyń syılyǵyna ıe boldy. Osy nagrada sondaı-aq «Al sen kimsiń, ózi?» jáne «Mahabbat progresi» kitaptary úshin de berildi. Sondaı-aq E.Mýnro «Jastyq shaǵymnyń dosy» jáne «Mahabbat - jaqsy áıel» atty kitaptary úshin Trillium jáne Giller kitaptar syılyǵyn aldy. Kóptegen synshylar onyń áńgimeleri emotsııalyq, ádebı tereńdigi jaǵynan romandarǵa tatıdy dep sanaıdy.
