«Ádebı ólketaný» jobasymen qalamgerler Batys Qazaqstan oblysyn aralap júr
Atalmysh jobany "Rýhanı jańǵyrý" baǵdarlamasy aıasynda Qazaqstan Jazýshylar odaǵy QR Prezıdenti Ákimshiligimen birlesip qolǵa alǵan bolatyn.
Mundaǵy maqsat - qalamgerlerdiń oblystardyń rýhanı ómirimen tereńirek tanysyp, tyń týyndylar jazýyna múmkindik berý.
Osyǵan oraı munyń aldynda Qazaqstannyń birneshe oblysynda bolǵan edi.
Bul joly atalmysh joba aıasynda Batys Qazaqstanǵa Almatydan jazýshy, Qazaqstan Jazýshylar odaǵynyń múshesi, "The Qazaq Times" aqparattyq, qoǵamdyq-saıası portalynyń bas redaktory, Ál-Farabı atyndaǵy QazUÝ jýrnalıstıka fakýltetiniń aǵa oqytýshysy Qoıshybek Múbárak pen jas aqyn, respýblıkalyq "Aq jelken" jýrnaly bas redaktorynyń orynbasary Asylan Tilegen keldi. Olarǵa Oraldan aqyn, Qazaqstan Jazýshylar odaǵynyń múshesi Ǵaısaǵalı Seıtaq qosyldy.
Qalamgerler aldymen Aqjaıyq aýdanynda boldy. Chapaev aýylynda turatyn shejireshi aqsaqal Amanǵalı Qaısaǵalıevpen kezdesip, el aýzynda júrgen áńgimelerdi jazyp aldy. Jer-sý attarynyń da shyǵý tarıhyna qulaq túrdi.
Budan keıin Oral qalasynyń kórnekti oryndarymen tanysty. Sonyń ishinde Qadyr ortalyǵynda bolyp, aqyn rýhyna taǵzym etti. Almatydaǵy aqyn-jazýshylardyń ishinde baı kitaphananyń biri bolyp tanylǵan Qadyr Myrza Álıdiń ómir boıyna jınaǵan kitaptary men ustanǵan buıymdarynyń syryna úńildi.
Sondaı-aq orystyń uly aqyny A.Pýshkın men E.Pýgachev memorıaldyq mýzeı-úıleri de erekshe áser etti.
"Meniń Aq Jaıyq óńirinde alǵash ret bolýym edi. Oral ádemi tarıhı qala eken. Áser keremet. Saparymyz nátıjeli bolady dep senemin. Meniń mıstıkama arqaý bolatyn biraz taqyryptar taptym", dedi Qoıshybek Múbárak.
Osy oblystyń Jańaqala aýdanynda týyp-ósken aqyn Asylan Tilegen áli de kórmegen jer, kezdespegen adamdardyń kóp ekendigin, sondyqtan qundy derekter men ańyz áńgimelerdi barynsha kóbirek jınaýdy maqsat etip otyrǵandyǵyn jetkizdi.
Shyǵarmashylyq top sonymen qatar Qaztalov, Bókeı ordasy jáne Qaratóbe aýdandarynda bolmaq.
