ADCB Kazakhstan Qazaqstandaǵy jobalardy qarjylandyrý kólemin 3 esege arttyrmaq
ASTANA. KAZINFORM - ADCB Kazakhstan aldaǵy bir jarym jylda qazaqstandyq jobalardy qarjylandyrý kólemin qazirgi 2,5 trln teńgeden 3 esege ulǵaıtýdy josparlap otyr. Bul týraly Qazaqstan Respýblıkasynyń Premer-mınıstri Oljas Bektenov Abu Dhabi Commercial Bank Kazakhstan (ADCB) dırektorlar keńesiniń tóraǵasy Farýh Al Marzýkımen kezdesýde málim boldy.
Kezdesý barysynda ADCB Group-tyń elimiz úshin mańyzdy jobalardy júzege asyrýǵa qatysýyn odan ári keńeıtý máseleleri talqylandy. Yntymaqtastyqtyń basym baǵyttary retinde ekonomıkanyń naqty sektoryn damytý jáne tsıfrlyq ınfraqurylymdy jańǵyrtý aıqyndaldy.
Abu Dhabi Commercial Bank – Birikken Arab Ámirlikterindegi eń iri bankterdiń biri. Bank halyqaralyq ınvestıtsııalyq deńgeıdegi nesıelik reıtıngterge ıe.
Kezdesý barysynda Qazaqstanda júrgizilip jatqan ınvestıtsııalyq tartymdylyqty arttyrýǵa yqpal etetin aýqymdy ekonomıkalyq jáne ınstıtýtsıonaldyq reformalardyń mańyzdylyǵy atap ótildi. Prezıdent Qasym-Jomart Toqaevtyń tapsyrmasy boıynsha jańa ınvestıtsııalyq tsıkl iske qosyldy jáne ınvestorlardy tartýǵa proaktıvti qarqyn berildi.
Premer-mınıstr Birikken Arab Ámirlikteriniń Qazaqstan ekonomıkasyn damytýǵa qosqan úlesin atap ótti. Sońǵy 20 jylda Qazaqstanǵa Ámirlikten túsken ınvestıtsııalar kólemi $7 mlrd-tan asty, onyń shamamen $3 mlrd-y sońǵy 2,5 jylda tústi.
ADCB Group-tyń BAÁ jáne Taıaý Shyǵystyń basqa elderinen ınvestorlar tartý jónindegi jumysqa qatysýy Qazaqstandaǵy jobalardy syrttan qarjylandyrý kózderin keńeıtýge jáne ártaraptandyrýǵa múmkindik beredi.
Óz kezeginde Farýh Al Marzýkı Qazaqstanmen energetıkalyq, temirjol ınfraqurylymy jobalaryn qarjylandyrý, munaı hımııasy, kólik jáne logıstıka salalaryndaǵy ýaǵdalastyqtardy júzege asyrý salasyndaǵy yntymaqtastyqtyń jemisti ekenin atap ótti.
Sońǵy 15 jylda ADCB Kazakhstan 100-den astam bıznes-bastamaǵa qarjylyq qoldaý kórsetti, onyń 90%-y ShOB jobalaryn quraıdy.
Kezdesý qorytyndysy boıynsha qatysýshylar ózara tıimdi yntymaqtastyqty odan ári damytýǵa múddeli ekenin jetkizdi.
Osyǵan deıin «Báıterek» 1 mlrd dollarlyq úsh daıyn jobany bankterge beretini týraly jazdyq.
