ADB sarapshysy: Aýyl sharýashylyǵy sektoryn damytý - Qazaqstannyń ekonomıkalyq ósimin qamtamasyz etedi

ALMATY. QazAqparat - Aýyl sharýashylyǵy sektoryn damytý, munaı baǵasynyń turaqsyzdyǵyna qaramastan, Qazaqstannyń ekonomıkalyq ósimin qamtamasyz ete alady. Búgin Almatyda Ortalyq Azııada agrobıznesti damytý máselelerine arnalǵan halyqaralyq forým barysynda Azııa damý bankiniń sarapshysy Lýrdes Adrıano hanym osylaı málimdedi.

Onyń aıtýynsha, jergilikti azyq-túlik ónimderiniń sapasyn arttyrý úshin memleket tarapynan halyqaralyq talaptarǵa saı jańa sapa standartyn qabyldaý qajet.

«Ortalyq Azııa óńiri, sonyń ishinde Qazaqstannyń et-sút jáne jemis-kókónis ónimderin óndirýde áleýeti óte zor. Biraq, ol áli de tolyq ashylmaǵan. Sondyqtan, biz qazir Almaty men Bishkek qalalary jáne olardyń aınalasyndaǵy oblystardyń áleýetin arttyrý maqsatynda zertteý jumystaryn júrgizip jatyrmyz», - dedi Lýrdes Adrıano.

Sonymen qatar forýmda, aýyl sharýashylyǵynda klasterler qurý boıynsha álemdik tájirıbeler qarastyryldy.

«Munaı baǵasynyń tómendeýine baılanysty álem elderinde ekonomıkanyń ósimi báseńdep jatyr. Bul jaǵdaıda aýyl sharýashylyǵy sektory jáne agrobıznestegi qosylǵan qun tizbegi klasteri Qazaqstannyń ekonomıkalyq ósiminiń turaqtylyǵyn qamtamasyz ete alady. Bul jerde «Almaty-Bishkek» ekonomıkalyq dálizi osy óńirdiń ınklıýzıvti damýyna baǵyttalǵan», - dedi L. Adrıano.

Aıta ketelik, Azııa damý bankiniń «Ortalyq Azııa óńirlik ekonomıkalyq yntymaqtastyǵy» baǵdarlamasy aıasynda 2014 jyly Almaty men Bishkek qalalary arasynda ekonomıkalyq dálizdi damytý boıynsha memorandýmǵa qol qoıylǵan. Dálizdi damytýdyń negizgi baǵyttary: bilim, densaýlyq, saqtaý, týrızm, aýyl sharýashylyǵy, qala damýy jáne basqa da salalar.

Búgingi forýmnan keıin Azııa damý bankiniń sarapshylary Bishkek qalasynda da osyndaı forým ótkizedi.