ADB bıýdjet tapshylyǵyn qarjylandyrýǵa 1 mlrd. dollar qaryz beredi - Senat
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operatsııalar) (Qarsy tsıkldik damýdy qoldaý) ratıfıkatsııalaý týraly» QR Zańyn qabyldady.
Qazaqstan men Azııa Damý Banki arasyndaǵy Kelisim 2015 jyldyń 18 qarashasynda Astanada qol qoıylǵan. Kelisimniń maqsaty makroekonomıkalyq jáne qarjylyq turaqtylyqty saqtaý, kirister ósiminiń turaqty qarqyny esebinen ekonomıkanyń tıimdi jáne sapaly ósimin qamtamasyz etý bolyp tabylady. Sonymen birge, kelisim boıynsha respýblıkalyq bıýdjet tapshylyǵyn qarjylandyrý úshin 1 mlrd. AQSh dollary mólsherinde qaryz beriledi.
«Tutastaı alǵanda, qarajat eldiń áleýmettik-ekonomıkalyq damýynyń negizgi basymdyqtaryn qoldaýǵa jáne Úkimettiń ekonomıkany yntalandyrý jáne ekonomıkalyq ósýge yqpaldasý jónindegi strategııalyq sharalarynyń oryndalýyna múmkindik beredi. Azııa Damý Bankiniń qaryzy 3 jyldyq jeńildik beriletin kezeńdi qosa alǵanda, 5 jyl óteý merzimimen usynylyp otyr», - dedi Qarjy mınıstri Baqyt Sultanov.
Tutastaı alǵanda, Qaryz qarajaty memlekettik qarjylar men respýblıkalyq bıýdjettik baǵdarlamalardy ýaqytyly qarjylandyrýdyń teńgerimdiligin qamtamasyz etedi. Parlament qabyldaǵan zań Memleket basshysynyń qol qoıýyna joldanady.
