Adaı jylqysy resmı mártebe alý úshin halyqaralyq jarysta synalady

Mańǵystaýda Adaı jylqysyn asyl tuqymdy retinde taný, resmı mártebe alý maqsatynda 100 shaqyrymdyq uzaq qashyqtyqta at jarysynan halyqaralyq týrnır ótedi, dep habarlaıdy Kazinform.

Alaman báıgede qazylyq etýge Birikken Arab Ámirlikterinen 6 tóreshi keledi. Dúbirli dodada 18 jastan asqan, salmaǵy 70 keliden kem emes shabandozdar baq synaı alady. Sonymen qatar arnaıy bas kıimi men jalpaq úzeńgisi, óksheli etigi bolýy shart. Tulpar tizgindeıtinder tirkeýden ótip, jylqy pasportyn kórsetýge mindetti. Týrnır 4 qarasha kúni Kendirli demalys aýmaǵynda bastalady.

- 3-4 qarasha kúnderi ótetin týrnırge Qostanaıdan, Aqtóbeden, Jetisý, Almatydan, Óskemennen shabandozdar qatysady. Shashaýyna shań juqpas 30-dan asa júırik jelmen júıitkıdi. Báıgege at qosý 2 qarashaǵa deıin jalǵasady. Jarys 4 etaptan turady. Shabandozdar birinshi jáne ekinshi aınalymda 30 shaqyrymdyq qashyqtyqty shaýyp ótse, úshinshi jáne tórtinshi aınalymda 20 shaqyrym qashyqtyqty eńseredi. Ár aınalymnan keıin tulparlardyń jaı-kúıi qatań tekseriledi,- dedi Qazaqstan Respýblıkasy at sporty federatsııasy RQB Mańǵystaý oblystyq fılıalynyń basshysy Orynbasar Qulbekov.

Jalpy bul at jarys 2011 - 2015 jyldar aralyǵynda ótti, odan keıin 2022-2023 jyly «Uly dala joryǵy» jarysynda jalǵasyn tapty.

Basty maqsat - «Adaı» jylqysynyń mártebesin alý. Sondyqtan tulpar ár túrli tekseristen ótkennen keıin ǵana júlde ádil túrde sheteldik sarapshylardyń sheshimimen beriledi.

Týrnır 4 qarasha saǵat 8.00- de Kendirli demalys aýmaǵynda bastalady. Al saltanatty ashylý rásimi saǵat 12:00-de ótedi.