Adaı jáne Qostanaı jylqylaryna jyl saıyn 140 mln teńge sýbsıdııa tólenýi múmkin
Májilis depýtaty Aıdarbek Qojanazarov sport baǵytyndaǵy qazaqy jylqy sanyn kóbeıtý týraly zań jobasy kimderge sýbsıdııa tóleýdi kózdeıtinin aıtty, dep habarlaıdy Kazinform.
«Sýbsıdııa tóleýdiń erejelerin aýyl sharýashylyǵy mınıstrligi zań qabyldanǵannan keıin ázirleıdi. Biz zań jobasy aıasynda 701 mln teńge bes jylǵa bólý kerek dep otyrmyz. Keıbir áriptesterimiz jetkiliksiz dep jatyr. Bıýdjet komıssııasyna shyǵyp, muny qaıtadan qarastyrýǵa bolady. Qazirgi tańda biz usynyp otyrǵan zań durys qoldanylatyny jáne nátıjesi bolatynyn dáleldeýimiz kerek», - dedi depýtat BAQ ókilderiniń saýalyna bergen jaýabynda.
Onyń sózinshe, bul sýbsıdııa Adaı jáne Qostanaı tuqymdy jylqy ustaıtyndarǵa berilmek.
«701 mln teńgeden jyl saıyn 140 mln teńge bólinip otyrady. Adaı jáne Qostanaı tuqymdy jylqynyń qazirgi sany 1000 bastan aspaıdy. Osy 1000 basqa jyl saıyn 140 mln teńge sýbsıdııa tóleýdi usynyp otyrmyz», - dedi Aıdarbek Qojanazarov.
