«Adamzattyń úmiti aqtalady» -baspasózge sholý

Keshe Astanadaǵy Táýelsizdik saraıynda Eýropadaǵy qaýipsizdik jáne yntymaqtastyq uıymynyń joǵary deń­geıdegi jetinshi Sammıti óz jumysyn bastady. EQYU-nyń joǵary deńgeıdegi Sammıtin Qazaqstan Res­pýblıkasynyń Prezıdenti Nursultan Nazarbaev sóz sóılep ashty jáne Sammıttiń birinshi sessııasyna tór­aǵalyq etti. Osyǵan oraı «Egemen Qazaqstan» gazeti búgingi sanynda «Astana sammıti bastaldy» degen taqyryp aıasynda Memleket basshysy N. Nazarbaevtyń Sammıtte sóılegen sóziniń mátinin jarııalady.

Sonymen qatar «Egemen Qazaqstan» gazetiniń búgingi nómirinde «Astana rýhy» bekite túsken «Helsınkı rýhy» degen taqyryppen maqala basyldy. Onda Astanadaǵy Saltanat saraıynda EQYU Sam­mıtine qatysqan delegatsııa basshylary­nyń qurmetine Qazaqstan Prezıdenti Nursult­an Nazarbaevtyń atynan resmı qabyldaý bolǵandyǵy jazylǵan. «Qabyldaýǵa qatysýshylar men qonaqtardyń aldynda sóılegen sózinde Memleket basshysy EQYU-nyń Astana Sammıtindegi sózderinde jáne pikir almasýlar kezinde saıası kóshbas­shylar osy Uıymnyń jıyrma birinshi ǵasyrda tabysty damýyna ortaqtastyqtaryn bildirgenin atap ótti», dep jazady basylym. «Eýropa men Soltústik Amerıkadaǵy, Ortalyq Azııa men Kavkazdaǵy 56 eldi biriktirip otyrǵan EQYU-nyń ulan-ǵaıyr keńisti­ginde ózara túsinistik pen qaýipsizdikti nyǵaıtý jahandyq qaýipsizdikti nyǵaıtý isine qosylǵan zor úles bolyp tabylatynyna senemin, - dep atap kórsetken N. Nazarbaev saltanatty qabyldaýda

«Aıqyn» gazetiniń búgingi sanynda «Adamzattyń úmiti aqtalady» degen taqyryppen maqala basyldy. Avtory - Jumabek Jandildın.«Astana sammıti qatardaǵy erikkenderdiń basqosýy emes, álemdegi eń yqpaldy memleketter basshylary men halyqaralyq uıymdar jetekshileriniń adamzattyń búgingi ómirinde bar jáne keleshekte bolýy múmkin keleńsizdikterdiń zardabyn azaıtýǵa baǵyttalǵan taqyryptardy sóz etetin alqaly aqylmandar jıyny. Oraıy kelgende aıta keteıik, biz sanap ótken taqyryptar adamzat kógine ıslam áleminen kóterilgen jańa juldyzdyń - Qazaqstannyń ulttyq Kóshbasshysy Nursultan Nazarbaev talaı alqaly jıyndarda alǵa tartqan ózekti de ómirsheń máseleler. Bir qýanyshtysy sol - olardy ómir aqıqatyna aınaldyrý birtindep alǵa jyljýda. Adamzat bul sammıtten osyndaı alǵa jyljýdyń qarqyndy qadamyn kútýge quqyly. Bizdińshe, adamzattyń úmiti aqtalady»,- deıdi maqala avtory.

Sondaı-aq «Aıqynnyń» búgingi nómirinde «Andorra sózi astana degen maǵyna beredi» degen taqyryppen Andorranyń týrızm, saýda jáne ındýstrııa mınıstri Klodı Bene MAStan alynǵan suhbat jarııalandy. Eger biz EQYU-ǵa tóraǵa bolatyn bolsaq, onda osyndaı sammıt ótkizýimiz kerek bolady ǵoı. Al Andorra sııaqty kishkentaı eldiń Astanadaǵydaı joǵary deńgeıdegi sammıtti ótkizýge múmkindigi joq. Al sizder uıym jıynyn utymdy uıymdastyryp otyrsyzdar. Men muny aıryqsha atap ótkim keledi. Ásirese, sammıttiń qaýipsizdigi joǵary deńgeıde oılastyrylǵanyn baıqadym. Eń bastysy, qazaq halqynyń aıryqsha qasıeti - qonaqjaılylyǵyna qaıran qaldym», deıdi suhbatynda andoralyq mınıstr.

«Kazahstanskaıa pravda» gazeti Astanadaǵy EQYU Sammıti barysynda AQSh Memlekettik hatshysy Hılları Klınton men QR Memlekettik hatshysy-Syrtqy ister mınıstri Qanat Saýdabaevtyń BAQ ókilderine arnap ótkizgen brıfıngi jaıly jazady. Maqala «Hılları KLINTON: Kazahstantsy mogýt gordıtsıa svoımı dostıjenııamı » degen taqyryppen berilgen. Onda AQSh-tyń Memlekettik hatshysynyń Qazaqstannyń EQYU-ǵa tóraǵalyǵyn joǵary baǵalaǵany, jańa ǵasyrda alǵash ret ótkizilip otyrǵan Astana Sammıtti Uıym qyzmetine tyń serpin beretindigine senim bildirgendigi aıtylady.

«Ekspress K» gazeti búgingi sanynda Astana Sammıti týraly birneshe maqala jarııalady. Gazettiń 2 jeltoqsandaǵy sanynyń birinshi betinde «Kazahstan gotov stat mostomevrazııskoı bezopasnostı », «Globalnoe poteplenıe v Astane », «Damy protıv zatıajnyh konflıktov » degen taqyryptarmen kólemdi úsh maqala basylǵan. Sonymen qatar «Sammıt OBSE - 2010» aıdarynda alqaly jıynǵa qatysyp jatqan delegatsııa basshylarynyń Sammıt jónindegi pikirleri berilgen.