«Adamzattyń bárin súı baýyrym dep...» - almatylyqtar birlik kúnin toılap jatyr

ALMATY. QazAqparat «Adamzattyń bárin súı baýyrym dep...», qazaq halqynyń bas aqyny Abaı Qunanbaıulynyń osy bir támsilin búgingi merekeniń tumaryndaı etken Almatydaǵy halyqtar birligi kúni Qazaqstandaǵy tatýlyqty taǵy bir pash etti, dep habarlaıdy QazAqparat tilshisi.

  
Almatynyń Respýblıka saraıy aldynda qurylǵan bas sahna halyqtar dostyǵy men óneriniń jarqyn kórinisi boldy. Buǵan deıin habarlaǵanymyzdaı, búgingi sahnada Ázerbaıjan, Tatarstan, Ózbekstannan kelgen ánshiler otandyq ónerpazdarmen sahna ajaryn kirgizse, 300 bıshiniń «Qazaqstan  bizdiń ortaq úıimiz» kompozıtsııasyn oryndaýy kórermen úshin syılyq bolǵany sózsiz. 

 
«300 bıshiniń sahna tórinde birdeı bıleýin erekshe atap óter edim. Ár ult ókiliniń bıleri qandaı tamasha. Ásirese, Ózbekstannan kelgen ánshiniń oryndaýyndaǵy «Rýmolım» áni men bıshileri tipti, keremet. Myna alańǵa kire beriske Abaıdyń «Adamzattyń bárin súı baýyrym dep» degen sózin jazyp qoıypty. Óte durys. Qazaqstanymyzdaǵy osy birlik eshqashan buzylmasyn», - deıdi Almatyǵa qonaqqa kelgen shyǵysqazaqstandyq ustaz Bımaıra Oqanqyzy.

 
Aıta keteıik, búgin Almatynyń 8 aýdanynda 1 mamyr Qazaqstan halqy birligi kúni toılanyp jatyr. Respýblıka saraıy aldyndaǵy basty sahnaǵa Almatydaǵy 34 etno-mádenı birlestik óz shatyryn tigip, dástúrin tanystyrdy. Alańda 6 túrli tásilmen 300 keli kúrish pisirildi. Búgin keshke Týretskıı hory ujymy óner kórsetedi.