Adamzattyń beıbit damý qundylyqtaryn ujym bolyp ilgeriletetin ýaqyt keldi - Toqaev
ASTANA. KAZINFORM - Prezıdent Qasym-Jomart Toqaev ShYU-ǵa múshe memleketterdiń Syrtqy ister mınıstrlerimen kezdesýi barysynda búkil adamzat úshin beıbit damý qundylyqtaryn ujym bolyp ilgeriletetin ýaqyt kelgenin atap ótti, dep habarlaıdy Aqordanyń baspasóz qyzmeti.
Prezıdenttiń pikirinshe, jahandyq strategııalyq turaqsyzdyq jaǵdaıynda keshendi tásilderdi qoldanýdyń, barlyq taraptyń múddesin eskerýdiń jáne únemi mámilege kelý joldaryn izdeýdiń mańyzy artyp keledi,
Memleket basshysy búkil adamzat úshin beıbit jáne úılesimdi damý murattary men qundylyqtaryn ujym bolyp ilgeriletetin ýaqyt keldi dep sanaıdy.
– Sondyqtan Qazaqstan ShYU-nyń «Ádiletti álem men kelisimdi jaqtaıtyn dúnıejúzilik birlik týraly» bastamasyn ázirleýdi usyndy. Osy qujattyń, sondaı-aq aldaǵy sammıt barysynda ShYU-nyń Astana deklaratsııasynyń qabyldanýy, bizdiń kózqarasymyz boıynsha, álemniń túrli óńirlerindegi qaqtyǵystardy retteý úshin halyqaralyq kúsh-jigerdi biriktirýge yqpal etedi. ShYU-ny odan ári reformalaý isine erekshe mán berý qajet. Osy Uıymnyń qyzmetin jetildirýge baǵyttalǵan naqty sheshimderdi daıyndaýǵa múshe memleketterdiń belsendi qatysýy mańyzdy. Qazaqstan óz tarapynan ShYU-ny yntymaqtastyqtyń tıimdi jáne kópjaqty tetigine aınaldyrý jóninde teńgerimdi usynys jasady. Aldaǵy ýaqytta da osy bastamalar qoldaý tabady dep úmittenemiz, – dedi Prezıdent.
Memleket basshysy ShYU-nyń ortaq syn-qater men qaýipterdi eńserý isindegi áleýetin arttyrý jumystary der kezinde qolǵa alynyp otyrǵanyn atap ótti
Osy oraıda Qasym-Jomart Toqaev «úsh zulym kúshke» qarsy kúres Uıym yntymaqtastyǵynyń turaqty nazarynda bolýǵa tıis dep sanaıdy.
– Qazaqstan osy baǵyttaǵy yqpaldastyqty udaıy nyǵaıtýǵa nıetti. Terrorızmge, separatızmge jáne ekstremızmge qarsy kúres jónindegi sizdermen kelisilgen yntymaqtastyq baǵdarlamasy bul baǵytta jasalǵan naqty qadam sanalady. Óz kezeginde ShYU-nyń esirtkige qarsy strategııasy boıynsha jumystyń aıaqtalýy, terrorızmdi qarjylandyrý arnalaryn buǵattaýdy qosa alǵanda, esirtki qaýpine qarsy kúresý úshin ózara qabyldanyp jatqan sharalardy kúsheıte túsedi. Osy jetistikterdiń barlyǵy – Uıym keńistiginde turaqtylyq pen qaýipsizdikti qamtamasyz etý jónindegi kelisilgen jáne naqty sharalardyń aıqyn dáleli. Bul halyqaralyq qatynastardyń jahandyq arhıtektýrasyndaǵy ustanymdy nyǵaıtý, ShYU-nyń álemdegi bedeli men rólin arttyrý turǵysynan da mańyzdy, – dedi Memleket basshysy.
