«Adamzattyń Abaıy» respýblıkalyq aqyndar aıtysynda Maqsat Aqanov jeńimpaz atandy

SEMEI. KAZINFORM – Abaı oblysynda Abaıdyń 180 jyldyǵyna arnalǵan respýblıkalyq aqyndar aıtysynyń jeńimpazdary belgili boldy.

Tańerteń bastalǵan respýblıkalyq aqyndar aıtysynda ot tildi, oraq aýyzdy 12 aıtysker uly aqynnyń murasynan, shyǵarmashylyǵynan sóz qozǵap, kópti tánti etti.

Jyr dúldúlderiniń báıgesin belgili aıtysker aqyn, Parlament Májilisiniń depýtaty Amanjol Áltaev júrgizdi. Qazylar alqasynyń tóraǵasy — QR eńbek sińirgen qaıratkeri Júrsin Erman. 

Memleket jáne qoǵam qaıratkeri, QR Eńbek sińirgen qaıratkeri Saýytbek Abdrahmanov, aqyn Tólegen Janǵalıev, Dáýletkereı Kápuly, Serik Qalıev, Qalqaman Sarın, Májilis depýtattary Rınat Zaıytov pen Janarbek Áshimjan, aıtysker aqyndar men jyrshy-termeshilerdiń halyqaralyq odaǵynyń Abaı oblysy fılıalynyń tóraǵasy Dáýlet Smetov aıtysqa qazylyq etti. 

Aıtys qorytyndysy boıynsha 3-oryndy Ásem Erejeqyzy men Jansaıa Mýsına ıelendi. Olardyń árqaısysyna 1 mln teńgeden berildi. Al 2-orynǵa laıyq dep tanylǵan Aıbek Qalıev pen Meıirbek Sultanhan 1,5 mln teńgeden qarjylaı syılyq aldy. Birinshi oryn alǵan Rústem Qaıyrtaıuly 3 mln teńgeni qanjyǵasyna baılady. Al bas júlde men «Chery Tigo 2 pro» markaly avtokólikti básekelesterinen oza shapqan qaraǵandylyq Maqsat Aqanov jeńip aldy. Sóz buıdasyn ustaǵan basqa da aqyndarǵa 500 myń teńgeden berildi. Oblys ákiminiń atyndaǵy arnaıy júlde Muhtar Nııazovqa buıyrdy. 

Aımaq basshysy Berik Ýálı Abaı toıyna oraı uıymdastyrylǵan respýblıkalyq aıtysqa tórelik etken qazylar alqasynyń árqaısyna arnaıy jasatylǵan Abaı shapany men taqııasyn jáne Shymkent qalasyndaǵy fabrıkadan shyqqan mereıtoılyq kilemsheni tartý etti.

Eske salsaq, osyǵan deıin Abaıdyń 180 jyldyǵyna oraı Semeıde respýblıkalyq aqyndar aıtysy ótip jatqany jaıly jazǵanbyz.