Adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastaldy – Toqaev
«Qazir álemde geosaıası ahýal ýshyǵyp tur. Soǵan qaramastan, el ekonomıkasynyń negizgi baǵyttary boıynsha kórsetkishter ósti. Byltyr Qazaqstannyń ishki jalpy ónimi 104 trıllıon teńge boldy. Elimizge 28 mıllıard dollar tikeleı shetel ınvestıtsııasy tartyldy. Bul – rekordtyq kórsetkish. Syrtqy saýda-sattyq buryn bolmaǵan deńgeıge, ıaǵnı 136 mıllıard dollarǵa jetti. Onyń 84 mıllıardy – eksport. Syrtqy qorymyz 100 mıllıard dollarǵa jýyqtady. Bul, eń aldymen, ekonomıkalyq turaqtylyǵymyzdyń asa mańyzdy kepili ekeni sózsiz. Árıne, basqa elder de qarap otyrǵan joq, olar da alǵa qaraı umtylyp, damýda. Bir sózben aıtqanda, jahandyq ekonomıka jáne halyqaralyq eńbek naryǵy túbegeıli ózgerýde», - dedi Qasym-Jomart Toqaev.
Prezıdent tehnologııalyq báseke qyzyp turǵanyna basa nazar aýdartty.
«Barlyq jerde resýrstar úshin talas júrip jatyr. Klımattyń ózgerýi, azyq-túlik qaýipsizdigi jáne demografııalyq turǵydan ornyqty damý eń ózekti máselege aınaldy. Bir sózben aıtqanda, adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastaldy. Osyndaı asa mańyzdy shaqta zor ekonomıkalyq serpilis jasaýǵa elimizdiń tolyq múmkindigi bar. Ol úshin biz birtindep jańa ekonomıkalyq úlgige ótýimiz kerek. Bul jumysty batyl júrgizýimiz qajet. Basty maqsat – qaǵaz júzindegi bıik jetistikterge qol jetkizý emes, shyn máninde halyqtyń turmys sapasyn jaqsartý bolýǵa tıis», - dedi Memleket basshysy.
