Adamzat tarıhynda 220 myń tonnaǵa jýyq altyn óndirilgen
ASTANA.KAZINFORM — Adamzat tarıhynda óndirilgen altynnyń jalpy kólemi 2025 jyldyń sońyna qaraı shamamen 220 myń tonnaǵa jetip, onyń naryqtyq quny 31 trln dollar shamasynda baǵalanǵan. Bul derekter World Gold Council esebinde keltirilgenin BELTA habarlady.
Sarapshylardyń málimetinshe, altyn qorynyń basym bóligi zergerlik buıymdar túrinde saqtalǵan — 44% nemese 97,65 myń tonna (shamamen 14 trln dollar). Quımalar men monetalar úlesine 21% (46,95 myń tonna, 7 trln dollar), al ortalyq bankterdiń rezervterine 18% (38,67 myń tonna, 5 trln dollar) tıesili.
Sonymen qatar, altynmen qamtamasyz etilgen ETF qorlarynda 2% (4,025 myń tonna, 0,6 trln dollar), ınstıtýtsıonaldyq jáne jeke ınvestorlardyń bırjadan tys aktıvterinde 5% (shamamen 10 myń tonna, 1,5 trln dollar) saqtalǵan. Al qalǵan 10% (22,6 myń tonna, 3 trln dollar) ónerkásip pen tehnologııa salalarynda paıdalanylady.
Mamandardyń aıtýynsha, altyn is júzinde joıylmaıtyn metall bolǵandyqtan, buryn óndirilgen qorlar aınalymda qala beredi. Sondyqtan naryq tek jańa óndiris esebinen ǵana emes, bar qorlardyń qaıta bólinýi arqyly da qalyptasady.
Altyn qory jylyna shamamen 1,8% ósip otyrady. Bul baıaý ósim ýaqyt óte kele tapshylyqty kúsheıtip, onyń uzaq merzimdi qunyn qoldaıdy. Sarapshylar qysqa merzimdi suranys ózgeristeri, ásirese ınvestıtsııalyq aǵyndar áserinen, altyn baǵasyna aıtarlyqtaı yqpal etýi múmkin ekenin atap ótedi.
Buǵan deıin Taıaý Shyǵystaǵy qaqtyǵysqa baılanysty altyn men kúmistiń baǵasy arzandaǵanyn jazdyq.
