Adamzat tarıhı jolaıryqta tur – Qasym-Jomart Toqaev

BÝRABAI. KAZINFORM – Qazaqstan máseleni tıimdi sheshe alatyn myqty elge aınalý kerek. Prezıdent Qasym-Jomart Toqaev Ulttyq quryltaıdyń ІV otyrysynda adamzat aldyndaǵy syn-qaterlerdi aıta kelip, memleket aldynda qandaı mindetter basym baǵytqa ıe ekenine toqtaldy.

- Taǵy da qaıtalap aıtamyn: qazir adamzat jańa dáýirdiń sıpaty aıqyndalatyn tarıhı jolaıryqta tur. Alǵa qaraı qaryshtap damýǵa Qazaqstannyń múmkindigi jetedi. Qazir jer sharynyń turǵyndary qartaıyp bara jatyr. Osy turǵydan alǵanda, Qazaqstandy jas ári bilimdi azamattardyń eli dep aıtýǵa bolady.

Jer kólemi jóninen álemde toǵyzynshy oryn alatyn elimizdiń, jalpy, kólik-tranzıt salasynda zor múmkindikteri bar. Bul – aıryqsha nazar aýdarýdy talap etetin strategııalyq baǵyt, - dedi Memleket basshysy.

Ol úshin elimizde bilim men ınnovatsııaǵa negizdelgen damyǵan ári joǵary tehnologııalyq ekonomıka qalyptasýy kerek. 

- Biz elimizdiń áleýetin nyǵaıta túsýimiz kerek, ıaǵnı azamattardyń muń-muqtajyna qulaq asatyn jáne eń bastysy, máseleni tıimdi sheshe alatyn áleýeti myqty el bolýymyz qajet.

Sondyqtan bilim men ınnovatsııaǵa negizdelgen damyǵan ári joǵary tehnologııalyq ekonomıka qurýǵa tıispiz. Munyń bári azamattar úshin jasalady. Sebebi adam – bizdiń memleketimiz úshin eń basty qundylyq, - dedi Qasym-Jomart Toqaev.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.