Adamzat órkenıetiniń áleýmettik-rýhanı damýy úshin din lıderleriniń róli artady - Áshimbaev
«Aldaǵy ýaqytta da álemdik jáne dástúrli dinder lıderleri sezdiń múmkindigi men áleýetin tıimdi paıdalanýynyń mańyzy zor. Bul qazirgi kezeńde óte ózekti. Koronavırýs pandemııasy adamdardyń qalypty ómirin ózgertip qana qoımaı áli kúnge deıin álemniń damýyna keri áserin tıgizýde. Qazirgi tańda COVID indetinen álem boıynsha 4,5 mln adam kóz jumdy. Odan bólek, ondaǵan mln adamnyń densaýlyǵy syr berdi. BUU keltirgen derekter boıynsha 2020 jyly álemdik ekonomıka 4,3 paıyzǵa qysqarǵan. COVID-19 saldarynan álemdik ekonomıkaǵa kelgen shyǵyn 3,5 trln dollardan asyp jyǵylady. Dúnıejúzinde árbir úshinshi jumys berýshi jumys saǵatyn, al shamamen ár 5-shi jumys berýshi jumysshylaryn qysqartýǵa májbúr bolǵan. Sonyń saldarynan kóptegen elde áleýmettik problemalar ýshyǵyp ketti. Jumyssyzdyq, áleýmettik teńsizdik, qylmys sııaqty keleńsizdikter kóbeıdi. Dúnıejúzilik banktiń esebi boıynsha pandemııa kedeılik deńgeıinde ómir súretin adam sanyn shamamen taǵy da 100 mln-ǵa kóbeıtken», - dedi Senat Tóraǵasy.
Onyń atap ótýinshe, azyq-túlik baǵasynyń ósýi men ınflıatsııa tabysy tómen elderdegi azyq-túlik qaýipsizdigine aıtarlyqtaı zardabyn tıgizdi.
«BUU baǵalaýyna sáıkes, pandemııa saldarynan álemde ashyǵýǵa májbúr adamdardyń sany 83 mln-nan 132 mln-ǵa deıin ósýi yqtımal. Osyndaı jahandyq syn-qaterlerge qarsy turý kezinde yntymaqtastyq pen ózara is-qımylǵa eshqandaı balama joq. Pandemııanyń basty sabaqtarynyń biri de osy bolýy kerek dep esepteımiz», - dedi Máýlen Áshimbaev.
Senat spıkeri pandemııanyń taǵy bir mańyzdy sabaǵy – qoǵamda rýhanı jáne adamgershilik qundylyqtardy keńinen dáripteýmen baılanysty ekendigin basa aıtty.
«Sondyqtan pandemııadan keıingi kezeńde adamzat órkenıetiniń áleýmettik-rýhanı damýy úshin álemdik jáne dástúrli dinder lıderleriniń róli arta túsetini anyq», - dedi ol.
