Adamzat ómirdegi qatelikterinen sabaq alýy tıis - Serikbaı qajy Oraz
ASTANA. QazAqparat - Adamzat ótken ómir soqpaqtaryndaǵy shalt ketken qatelikterinen sabaq alýy tıis. Bul týraly búgin Álemdik jáne dástúrli dinder kóshbasshylary VI sezi aıasyndaǵy «Qubylmaly geosaıası jaǵdaıdaǵy dinder: adamzatty toptastyrý úshin jańa múmkindikter» atty sessııasynda Qazaqstan Musylmandary dinı basqarmasynyń tóraǵasy, Bas múftı Serikbaıqajy Oraz aıtty, dep habarlaıdy QazAqparat tilshisi.
«Ótkenimizge nazar salsaq, tarıh qatparyndaǵy nebir qaraquıyn páleket, surapyl soǵys, kúrkireýik qaqtyǵystardyń oryn alýyna adam boıyndaǵy astamshyl pıǵyl men daraqy dandaısýshylyq hám tákapparlyq pen ústemshildikke úıirsek qaranıettiń túrtki bolǵanyna kóz jetkizemiz. Adamzat balasynyń qasireti men qazabatyna - izgilikten bet buryp, adamshyldyq aq peıilden aýytqyp, áý bastaǵy dúnıege kelýdegi murat-maqsattan aınýy, qaradúrsindik pen qatigezdikke boı aldyrýy áser etkeni talassyz shyndyq. Al, osyndaı áleıim jurttyń janarynan qandy jas sorǵalatqan alapattardyń aldyn alý úshin adamzat ótken ómir soqpaqtaryndaǵy shalt ketken qatelikterinen sabaq alýy tıis. Osy turǵyda ǵalamdyq beıbitshilikke úndegen kez kelgen izgi qadam, onyń ishinde dástúrli din jetekshileriniń suhbattastyq ornatýy adamzat balasyn tatýlyqqa úndeýi, adaldyq maqsat-múddesin tanyp bilýge ún qatysýy, sóz joq asa mańyzdy is-sharaǵa jatady», - dedi Serikbaı qajy Oraz.
Onyń aıtýynsha, tarıhı kezeńderdegi alǵysharttardyń negizinde ulttar men ulystardyń áralýandyǵy qalyńdaı túsip, dinı nanymdardyń ózgeriske ushyraı bastaǵany belgili. Bul adamzattyń árkelki ómir súrý formasynyń qalyptasýyna sebep boldy. Sondaı-aq túrli dinı nanymdar - Jaratýshyny ózindik turǵyda tanytyp qana qoımaı qoǵamdaǵy qatynas barysynda belgili bir ólshemder men qaǵdıattardy týǵyzdy. Osynyń negizindegi alajańqa kózqarastardan tarıhta túrli qaıshylyqtardyń oryn alǵanyn joqqa shyǵarýǵa bolmaıdy. Áıtkenimen adamzat balasyna keneýsiz talas-tartystan góri - tatýlyqta, syńar ezý ymyrasyzdan qaraǵanda yntymaqtastyqta ómir súrý asa qajet. Osy turǵydan alǵanda qazirgi tańda dinı suhbattastyq pen dinı tózimdiliktiń nasıhaty aýadaı qajet ekendigi barshaǵa túsinikti.
«Bizdiń kóregen kóshbasshymyz Nursultan Nazarbaev ǵalamdaǵy turaqtylyq pen beıbitshilikti saqtap qalý úshin úshinshi myńjyldyqtyń basynda Astanada alǵash ret álemdik jáne dástúrli dinder jetekshileriniń quryltaıyn ótkizdi. Bul ıgi bastama áý degennen-aq óz údesinen shyǵyp, ómirsheń platforma ekenin áıgileı aldy. Elordamyzǵa attaı qalap shaqyrylǵan din kóshbasshylarynyń bes sezi ótti. Dinı tanym túsinikteriniń ártúrli bolǵanyna qaramastan álemdik dinı jáne rýhanı jetekshilerdiń Astanada bas túıistirip, keleli máslıhat ótkizýi álbette ǵalamdyq deńgeıdegi úlken jetistik edi. Elbasymyz N.Nazarbaevtyń bul bastamasy álemdik jáne dástúrli dinderdiń beıbit qarym-qatynasynyń altyn kópirine aınalǵany ámbege aıan», - dedi elimizdiń Bas múftıi.
Aıta keteıik, Álemdik jáne dástúrli dinder kóshbasshylarynyń VI sezi keshe Elbasy Nursultan Nazarbaevtyń tóraǵalymen bastalǵan bolatyn. Alqaly jıynǵa barlyq álemdik jáne dástúrli dinderdiń ókilderi, sonymen qatar bedeldi dinı lıderler, saıası qaıratkerler men halyqaralyq uıym ókilderinen quralǵan 46 elden 82 delegatsııa qatysty.
Bıylǵy jahandyq sharanyń basty jáne negizgi taqyryby - «Dinı lıderler qaýipsiz álem úshin».
