«Adamzat bıigin bilekpen emes, bilimmen baǵyndyrýdyń zamany» - respýblıkalyq basylymdarǵa sholý

***

Keshe Qazaqstan Respýblıkasynyń Prezıdenti Nursultan Nazarbaev Astanadaǵy «Nazarbaev ýnıversıteti» kommertsııalyq emes aktsıonerlik qoǵamynyń stýdentteri men professor-oqytýshylary quramy aldynda dáris oqydy jáne stýdentter tarapynan qoıylǵan suraqtarǵa jaýap qaıtardy. Osyǵan oraı «Egemen Qazaqstan» gazetiniń búgingi sanynda «Adamzat bıigin bilekpen emes, bilimmen baǵyndyrýdyń zamany» degen taqyryppen kólemdi maqala jarııalandy. Basylymnyń jazýynsha, Elbasy óz dárisinde Astanadaǵy jańa ýnıversıtetti Eýrazııadaǵy iri ǵylymı-bilim beretin ortalyqqa aınaldyrý qajettigin atap ótken. Memleket basshysynyń sózine qaraǵanda, mańyzdy ulttyq joba retinde tanylatyn bul oqý ornyn qurýdy ózi jeke qadaǵalaıtyn bolady. Ol Astanany damytýǵa, sondaı-aq bizdiń elimizdiń barlyq salalaryn damytýǵa júıeli túrde oń áser etedi. Sondyqtan da jańa ýnıversıtet erekshe mártebege ıe bolady, ol arnaıy zańnamalyq aktilerge negizdelip, is-áreket etpek. «Ýnıversıtettiń meniń atymdy ıelenýine tuńǵysh ret kelisim berip otyrmyn. Bul onyń qalyptasýyna jáne damýyna barlyq memlekettik qurylymdardyń jáne JOO-lar ujymy jetekshileriniń jaýapkershiligin arttyrý úshin jasalyp otyr. Jańa ýnıversıtettiń qurylýynyń ba­lyq aspektileri Qazaqstan úshin, ásirese, bizdiń jastar úshin jańa múmkindikterdi ashýdan turady. Bizdiń ortaq mindetimiz - ony bilim berý jáne ǵylymı zertteýler boıynsha álemdik deńgeıge alyp shyǵý», - deıdi N.Nazarbaev.

«Keleshegi kemel ekonomıkalyq keńistik». «Egemen Qazaqstan» gazetinde osy taqyryppen basylǵan maqalaǵa keshe Premer-Mınıstr Kárim Másimovtiń tóraǵalyǵymen ótken Úkimettiń otyrysy arqaý bolǵan. Úkimet músheleri alqaly jıynda Biryńǵaı ekonomıkalyq keńistiktiń (BEK) kelisimshart-quqyqtyq bazasyn qalyptastyratyn kelisimderdiń jobalaryn talqylap, bekitti. «2010 jyldyń 1 qańtarynan beri jemisti jumys istep kele jatqan Keden odaǵy Birtutas ekonomıkalyq keńistik qurýǵa yqpal jasady. 170 mıllıon halqy bar orasan zor rynok quryldy. Biryńǵaı kedendik keńistikte kedendik kedergiler alynyp tastaldy. Bul úsh eldiń kásipkerleri men bıznes sýbektilerine orasan zor múmkindikter ashty. Bıylǵy jyldyń 9 aıynyń qorytyndysy boıynsha, Keden odaǵy aıasynda taýar aınalymy 30 paıyzǵa ósken. Qazaqstannyń 9 aıdaǵy Reseıge ónim eksporttaý kólemi 48 paıyzǵa artqan», - dep jazady basylym.

***

«Aıqyn» gazetiniń jazýynsha, 7 jeltoqsan kúni VІІ qysqy Azııa oıyndarynyń resmı ánuranyn anyqtaý maqsatynda jarııalanǵan baıqaý óz máresine jetip, jeńimpazdyń esimi saltanatty túrde jarııalandy. Uıymdastyrý alqasyna 105 ótinish kelip túskendigin eske salǵan basylymnyń jazýynsha, qazylar alqasy olardyń arasynan on úmitkerdi iriktep, bir aıǵa jýyq ýaqyt áýe tolqynynan turaqty túrde berilip otyrdy. Osylaısha kópshilik ózi qalaǵan ánge SMS arqyly daýys berýge múmkindik alǵan edi. Nátıjesinde halyqtan 3500 habarlama joldanyp, 49,5 paıyz upaı jınaǵan Eskendir Hasanǵalıevtyń «Azıada alaýy» áni bas júldege ıe boldy.

«Jaqynda qazaqstandyq buqaralyq aqparat quraldary «Qazaqstan musylmandarynyń odaǵy» jáne shveıtsarlyq Humanitas Helvetica qoǵamdyq uıymy Almatynyń burynǵy ákimi Vıktor Hrapýnovtyń qyzmetin tergeý úshin komıssııa qurdy» degen habar tarady. Maqsattary - onyń qandaı bıznes arqyly mıllıoner bolǵanyn anyqtaý», dep jazady «Aıqyn» gazeti sársenbilik sanynda shyqqan «Hrapýnovtyń qarjysyn tekserý kerek pe?» degen maqalasynda. Basylymnyń derek kózge súıenýine qaraǵanda, Hrapýnov qazir Shveıtsarııada turady, úlken laýazymdy qyzmette kórinedi. Jaqynda «Hrapýnovtyń balasy Eýropada bıznes ashpaqshy bolǵan eken, ondaǵy bılik «bızneske salatyn aqshań taza emes» dep, ruqsat bermeı qoıypty» degen sybys shyqqan. Endi álemdik banktiń júıesin «eń taza aqshadan» qurǵan shveıtsarııalyqtar Eýropadaǵy eń baı adamdardyń biri Vıktor Vıacheslovovıchtiń izine sham alyp túsken sııaqty.

***

«Alash aınasy» gazetiniń turaqty «Dat!» aıdarynda Qarjy polıtsııasy akademııasynyń bastyǵy, zań ǵylymynyń doktory Marat Bashımovpen aradaǵy suhbat «Qazaqstan qarjy krımınaldarynan birtindep tazaryp keledi» degen taqyryppen jaryq kórdi. Basylymnyń barlyq saýaldaryna tuşymdy jaýap bergen ol: «Paraqorlyqty túbirimen qurtatyndaı, onyń asa qaterli nárse ekendigin bárimiz biliýimiz kerek. Ony qoǵamda joıý múmkin emes degen pikir qalyptasyp qalǵan. Ony joıý kerek. Menińshe, eń bastysy, qazirgi ofıtserlerdiń oı júıesi múlde basqasha bolýy tıis», - deıdi. Suhbattyń tolyq nusqasyn oqyǵyńyz kelse, basylymnyń sársenbilik sanyn jiberip almańyzdar.

Elimizdegi bazarlar men dúkenderdegi balalar kıimderiniń quramyn teksergen mamandar shoshyp otyr. Óıtkeni shekara asyp keletin kıimderdiń quramynan sábılerdi túrli dertke ushyratatyn hımııalyq qospalar tabylǵan. Talap boıynsha, sábı kıetin kımimderge sıntetıkalyq talshyqtar múldem qosylmaýy kerek. Alaıda qarasha aıynda nárestelerdiń kıimderin teksergen Metrologııa komıtetiniń mamandary kıimder quramynyń jartysynan kóbi sıntetıka ekenin anyqtaǵan. Bul jaıynda «Alash aınasy» gazetiniń sársenbiniń sátinde shyqqan nómirindegi «Kelimsek» kıim keleshegimizdi keselge uryndyryp jatyr» degen maqalada keńinen baıandalǵan. «Eń soraqysy, bul kıimderdiń balalar densaýlyǵyna tıgizer zardabynyń úlkendigi sonshalyq, tipti keleshekte balanyń belsiz bolyp qalý qaýpi de bar kórinedi. Qytaı men Qyrǵyzstannan jetkiziletin balalar kıimderi urpaq tamyryna balta shaýyp qana qoımaı, jetkinshekterdiń aıaǵyn maıtaban qylyp, býyn aýrýlarynyń paıda bolýyna da áser etetini dáleldengen», - dep jazady basylym.