Adamnyń jynysy ómir boıy ózgermeıdi degen pikiri úshin jumystan qýylǵan áıel sotta jeńip shyqty

LONDON. QazAqparat - Brıtan soty gender jaıly synı tvıtinen keıin jumysynan aıyrylǵan Maııa Forstaterge 100 myń fýnt sterlıng (shamamen 127 myń dollar) ótemaqy tóleý jóninde sheshim qabyldady, dep habarlaıdy QazAqparat BBC agenttigine silteme jasap.

2019 jyly Maııa Jahandyq damý saraptamalyq ortalyǵynda (CGD) salyq sarapshysy bolyp jumys istep júrgen.

Sol jyly naýryz aıynda ol óziniń Twitter paraqshasynda adam ne istese de, bıologııalyq jynysyn ózgerte almaıtyny týraly post jazady.

Sol tvıtten keıin jumys orny Maııamen kelisimshartty ári qaraı sozbaı qoıǵan.

Eńbek daýlaryn retteý trıbýnaly onyń kelisimshartyn uzartpaý týraly sheshim kisini kemsitýge jatady degen qorytyndyǵa keldi.

Sot ótemaqy retinde burynǵy jumys ornyn áıelge 91,5 myń fýnt sterlıng jáne ony keshiktirgeni úshin taǵy 15 myńǵa jýyq fýnt sterlıng ósimpul tóleýdi mindettedi.

Sex Matters («Jynys mańyzdy») aqparat naýqanyn bastaǵan Forsteıter kez kelgen adamnyń bıologııalyq jynysy ómir boıy ózgerissiz qalady jáne ony genderlik sáıkestikpen shatastyrýdyń qajeti joq dep sanaıdy.

Onyń aıtýynsha, sot sheshimi jumys berýshilerge «munyń naǵyz kemsitý» ekenin anyq kórsetip otyr.

Forsteıterdi jeńisimen birinshi bolyp quttyqtaǵandar qatarynda Garrı Potter týraly kitaptardyń avtory, jazýshy Djoan Roýlıng bar.

Ol da kezinde genderlik máseledegi ustanymy úshin birneshe ret áleýmettik jelide jekkórinishke ushyrap, mazaqqa aınalǵan bolatyn.

Sýdıalardyń pikiri de ekige bólindi.

Forsteıter 2019 jyly júgingen birinshi satydaǵy sot onyń shaǵymyn qanaǵattandyrýdan bas tartty. Sýdıa talapkerdiń kózqarasy «demokratııalyq qoǵamda qurmetke laıyq emes» dep málimdedi.

Sodan keıin Maııa apellıatsııalyq shaǵym túsirdi jáne eki jyldan soń Joǵarǵy sottyń sýdıasy ony qoldady.

Ol Forstaterdiń bul másele boıynsha jeke pikirge quqyǵy bar ekenin jáne ol 2010 jyly parlament qabyldaǵan Teńdik týraly zańmen qorǵalǵanyn aıtty.

Іs qaıta qaraýǵa jiberildi.

Sóıtip ótken jyly shildede apellıatsııa soty Maııany jeke kózqarasy úshin «tikeleı dıskrımınatsııaǵa» ushyraǵan dep sheshti.

Ótemaqy taǵaıyndaý týraly sońǵy sot sheshimine jaýap bergen CGD ókili ortalyqtyń árqashan óz qyzmetkerlerine qaýipsiz jáne ınklıýzıvti atmosfera qamtamasyz etýge tyrysatynyn atap ótti.