Adamnyń janyn tazalamaı turyp, tánin emdeý múmkin emes - QR Densaýlyq saqtaý mınıstrliginiń halyq medıtsınasy jónindegi mamany
ALMATY. 14 qyrkúıek. QazAqparat - Medıtsınalyq bilim berý júıesinde qazir synyqshylyq pen shóppen emdeý sııaqty halyqtyq emdeý ádisteri tómen deńgeıde tur.
Bul týraly QR Densaýlyq saqtaý mınıstrliginiń halyq medıtsınasy jónindegi bas mamany, QR Halyq rýhanı emshileri mekemesi jáne Akredıtatsııalaý ortalyǵynyń dırektory Sháken Shyntaev keshe Almatyda óz jumysyn aıaqtaǵan 2 kúndik «Eńbek naryǵynyń jahandaný jaǵdaıynda medıtsınalyq bilim berý» dep atalatyn halyqaralyq kongress barysynda aıtty.
«Dúnıejúzilik densaýlyq saqtaý uıymynyń málimetine qaraǵanda, qazir álem halyqtarynyń 65 paıyzy kóbine-kóp dástúrli halyq medıtsınasyna júginedi. Bul úrdis, ásirese, Azııa elderinde keń qanat jaıǵan. Ókinishke oraı, elimizde búgingi tańda elimizde medıtsnalyq bilim berý júıesinde dástúrli halyq medıtsınasy óz ornyn tappaı otyr. Sondyqtan bul másele aǵymdaǵy jyly Qazaq úzdiksiz bilim berý medıtsına ýnıversıteti bolyp qaıta qurylǵaly otyrǵan Almaty memlekettik dárigerler bilimin jetildirý ınstıtýtynyń aldaǵy ýaqytta aıryqsha nazarynda bolýy tıis», - deıdi professor Sh.Shyntaev.
Sháken Muqanulynyń sózine qaraǵanda, adamnyń janyn tazalamaı turyp, tánin emdeý múmkin emes. Batystyń hımııalyq emdeý ádistemesiniń paıdasymen qatar zııandy tustary da jetkilikti. Sondyqtan synyqshylyq, shóppen emdeý sııaqty halyqtyq emdeý ádisterin qaıta jańǵyrtyp, bilim jetildirý ınstıtýtynda biliktilik pen ádistemege kóbirek kóńil bólý qajet.
