Adamnyń janary jaınap tursa, ǵumyry uzaq bolady - 71 jastaǵy jelaıaq
Tóleýtaı Jamanbek júlde úshin emes, jumyr jerdiń kartasynda Qazaqstan degen el baryn tanytý maqsatynda marafondarǵa qatysatynyn aıtady. Bul bastamasyna demeýshiler de qoldaý kórsetetinine rıza. Alaıda, kóp jaǵdaıda qarjyny óz qaltasynan shyǵaratynyn jasyrmady.
Jelaıaq qarııa jattyǵýdan esh qol úzgen emes. Qysta shańǵy teýip shynyqsa, jazda velosıped tebedi.
«Meni kóbi jetpiske kelgen dep aıtpaıdy. Shashym aǵarǵanyna qaramastan, ári ketse 55 jasta shyǵarsyz dep jatady. Tipti, avtobýsta jol júrý kartamdy tekseredi, jeke kýáligimdi suraıdy. Keıde renjımin, zeınetker emessiz degende. Adam ózin jas sezinýi úshin kútinýi kerek, jaqsy uıyqtap, jaqsy tamaqtanyp, deneshynyqtyrýmen aınalysqany jón», - deıdi qarııa.
Tóleýtaı Jamanbek 2006 jyly Úndistanda ótken XIV Azııa birinshiliginde qola júldeger atanǵan. Halyqaralyq dárejedegi «Master-Atletık» ataǵy da bar. Jeńistiń 65 jyldyǵyna arnalǵan sýper-marafonda «Qaraǵandy-Máskeý» arasyndaǵy 3 700 shaqyrymdy 18 kúnde artta qaldyrdy. Jalpy sany 4 eldegi 125 qalany basyp ótipti.
«Ol marafonda 14 adam júgirdik. Kúnine 250 shaqyrymnan júgirip otyrdyq. Tańǵy altyda turamyz, sodan kún batqansha júgiremiz. Nege marafondy tańdadyńyz dep suraǵanda aıtatynym, marafonshy tek ózine qajymas qaırat jınap qana qoımaı, halqyna maqtanysh syılaıdy», - deıdi sportshy.
Tóleýtaı Jamanbek Shet aýdanynyń týmasy. Negizgi mamandyǵy – dene tárbıesi pániniń muǵalimi. Salaýatty ómir saltyn berik ustanǵan keıipkerimiz 25 jyl shahtada jumys istegen.
Marafonshy búginde Qaraǵandy qalasyndaǵy uzaq ómir súrý ortalyǵyna jıi keledi. Munda ózimen zamandas belsendi qarııalarmen birge túrli úıirmelerge qatysady. Qazir tennıs arqyly kórý qabiletin qalypqa keltirip júrgenin aıtady.
«Maǵan Kenııa, Marokko, Efıopııa elderiniń jelaıaqtary jiger syılaıdy. Keıde solarǵa uqsaǵym keledi dep aıtamyn. Áıelim men balalarym keıde: «Kórshilerden uıat qoı, qashanǵy júgire beresiń, qoısaıshy?!» - dep aıtady. Biraq, ol úshin maǵan kisen salyp qoıý kerek shyǵar. Tynysh otyra almaımyn. Menińshe, adamnyń janary jaınap tursa, ómiri mándi jáne uzaq bolady», - deıdi zeınetker.
Tóleýtaı Jamanbek ortalyqtaǵy bı úıirmesine de qatysady. Aptasyna eki ret ótkiziletin dáriske 40-tan astam zeınetker jınalatynyn aıtady. Marafonshy qarııa – mundaǵy jalǵyz er adam. Olar retro ánderge de bılep, kóńildi ýaqyt ótkizedi.
