Adamnyń ómir súrý uzaqtyǵyn anyqtaıtyn saǵat oılap tabyldy
ASTANA. QazAqparat - Shvedtik ónertapqysh adam ómiriniń uzaqtyǵyn anyqtaıtyn saǵatty jasap shyǵardy. Saǵat ýaqytty keri sanap, onyń ıesiniń qansha ómir súrý ýaqytynyń qalǵanyn kórsetedi, dep jazady Mail Online.
Gadjetke kópshilik «ajal saǵaty» degen ataý berip te úlgergen. Alaıda ony jasaǵan Fredrık Koltıng ony «Tıkker» dep atady. Saǵatty durys iske qosý úshin onyń ıesi arnaıy saýalnama toltyrýy kerek. Oǵan óziniń qandaı aýrýlarmen aýyrǵany týraly aqparattardy engizedi. Sonymen qatar ol óziniń alkogol men temeki ónimderin qanshalyqty tutynatynyn, áýletinde qaterli isik, sýsamyr jáne basqa da derttermen aýyrǵandardyń bolǵan-bolmaǵanyn da nazarǵa alýy tıis.
Saǵat taǵýshylardan qosymsha olardyń sportqa áýestigi, dene salmaǵynyń qansha ekeni suralady. Jınalǵan málimetter negizinde paıdalanýshynyń qazirgi jasy eseptelip, osylaısha onyń myna dúnıedegi tuz-dáminiń qashan taýsylýy múmkin ekendigi jaıly jalpy aqparat jasalady. «Tıkker» saǵatynyń quny - 80 dollarǵa jýyq.
