Adamnyń júreginen shyqqan bir aýyz sózdiń ózi bata bolýy múmkin — Nurlan ımam
ASTANA. KAZINFORM — Qazaq qoǵamynda bata berý dástúriniń máni erekshe. Alaıda ony jattandy sózge nemese sahnalyq kóriniske aınaldyrmaı, shynaıy nıetpen aıtý qajet. Bul týraly ımam Nurlan Baıjigituly «BIZDIN ORTA» podkastynda aıtty.
— Batany úıde berý kerek. Men ózim jıi aıtyp júrmin: nekelesken kezde batany ákesi, ata-anasy bersin. Qazaq bolmysyndaǵy uly personajdardyń biri — Qydyr ata. Sharıǵatta Qydyr ata degen túsinik joq. Biraq qazaq bolmysynda ol urpaq tárbıesine qatysty úlken mánge ıe. Bir adam Qydyr atadan balasyna bata berýin suraǵanda, ol «batany ákesi beredi, men «ámın» dep aıtamyn» degen eken. Bul bizdiń bolmysymyzdy kórsetedi, — dedi Nurlan Baıjigituly.
Imam batanyń mindetti túrde uzaq, uıqasty nemese mýzykalyq súıemeldeýmen aıtylýy shart emes ekenin atap ótti.
— Bata qysqa-nusqa, júrekten shyqqan, duǵa men tilektiń qasıetin boıyna jınaǵan sóz bolýy kerek. Ony aqyndarǵa jazdyrýdyń qajeti joq. Adamnyń júreginen shyqqan bir aýyz sózdiń ózi bata bolýy múmkin Adamnyń júreginen shyqqan bir aýyz sózdiń ózi bata bolýy múmkin. Batany shoýǵa aınaldyrýdyń keregi joq, — dedi ol.
Nurlan Baıjigitulynyń aıtýynsha, bataly adam bolý úshin kelinmen salǵylaspaǵan, balamen jaǵalaspaǵan, úlkenge qurmetsizdik jasamaǵan, kórshige júk bolmaǵan adam bolý kerek. Batanyń kúshi adamnyń sózi men isiniń úılesiminen kórinedi.
— Sonymen birge ol bata berý kezinde qazaqtyń dástúrli ádebin saqtaýǵa shaqyrdy. Onyń aıtýynsha, bata berýshi adam tursa, bata alýshylar tizerlep nemese ıilip qurmet kórsetkeni jón. Al bata berýshi otyrǵan jaǵdaıda, bata alýshylardyń ornynan turýy — qurmet belgisi.
Podkast sońynda Nurlan Baıjigituly birqatar blıts suraqtarǵa qysqa jaýap berdi.
— Úlken toı ma, shaǵyn toı ma?
— Orta toı.
— Nesıege toı jasaýǵa bola ma?
— Jaǵdaıǵa qaraı.
— Toıda bıleýge bola ma?
— Bolady.
— Torttyń alǵashqy bóligi anaǵa ma, jarǵa ma?
— Jarǵa.
— Balany jazalaýǵa bola ma?
— Qataldyq pen qatygezdikti ajyrata alǵan adam bolsa, bolady.
— Ul men qyzdy birdeı tárbıeleý kerek pe?
— Keıbir máselede birdeı, keıbirinde bólek.
— Otbasynda sońǵy sózdi kim aıtýy kerek?
— Sózi eń sońynda ótetin adam.
— Balaǵa smartfondy neshe jastan bergen durys?
— Ata-ana qadaǵalaı alatyn kezde bergen durys.
— TikTok pen Instagram-nan din úırenýge bola ma?
— Aqparat alýǵa bolady, biraq din úırenýge bolmaıdy.
— Qazirgi qazaq qoǵamynda eń jetispeı turǵan ne?
— Birlik.
Buǵan deıin dinı qaýym ádep pen bilimdi qatar dáripteýdiń mańyzyn aıtty.
