Adamı kapıtal róli kúrt artady - Prezıdent

NUR-SULTAN. QazAqparat - Qazirgi kezeńde adamı kapıtal róli kúrt artady. Bul týraly Sheteldik ınvestorlar keńesiniń 32-shi jalpy otyrysynda QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

Memleket basshysy jańa tehnologııalar álemdik ekonomıkanyń qurylymyn, sondaı-aq elderdiń básekege qabilettigin túbegeıli ózgertkenine toqtala kele, aldaǵy onjyldyqtarda adamzat tap bolatyn syn-tegeýrinderdi de eskerý qajettigin atap ótti.

"Qazirdiń ózinde jumysshy qyzmeti túrleriniń jartysy avtomattandyrylýy múmkin. 2030 jylǵa qaraı 75-ten 375 mıllıonǵa deıin adam, ıaǵnı jahandyq jumys kúshiniń 14 paıyzǵa jýyǵy qaıta oqytýdan ótýge nemese kásibin aýystyrýǵa májbúr bolady. 2018 jyly mektepke barǵan bala aldaǵy ýaqytta búginde joq kásipter boıynsha jumys isteıtin bolady" - dedi Prezıdent.

Memleket basshysynyń sózine qaraǵanda, jaqyn bolashaqta adamnyń tabystylyǵynyń negizgi daǵdylary retinde kognıtıvtik ıkemdiligi basymdyqqa ıe bolatynyn, óıtkeni bul baǵytty mashınalar meńgere almaıdy. Osy oraıda beıimdelý qabilettiligi, synı oılaý, jasampazdyq, ishki túısik, komandada jumys isteı alý qabiletin atap ótken jón.

"Alaıda bul boljamdardan qaımyǵýdyń reti joq. Tehnologııalardyń engizilýi adamzatty jumys oryndarynan aıyrmaıdy, alaıda olardyń tabıǵatyn ózgertedi. Bundaı qubylys adamzat tarıhynda qaıtalanǵan edi. Degenmen de qazirgi kezeńde adamı kapıtal róli kúrt artady, ásirese, bilim salasynyń róli erekshe bolady. Sondyqtan adamı kapıtalǵa ınvestıtsııa salý eldiń ekonomıkalyq damýy men jalpy qoǵam ál-aýqatynyń ósýine yqpal etedi. Qazaqstanda adamı kapıtaldy damytý boıynsha úlken jumysty júrgizýdemiz", - dedi Qasym-Jomart Toqaev.