Adamdy qutqarǵan Temirtaý turǵyny Adam Bol syılyǵymen marapattaldy
QARAǴANDY. QazAqparat – Temirtaý turǵyny Aleksandr Shahov ADAM BOL AWARDS birinshi jahandyq qazaqstandyq syılyǵynyń laýreaty atandy. Syılyqtyń quryltaıshysy Álııa Nazarbaeva. Adam Bol qarapaıym adamdardyń ıgi isteri men erlikterine arnalǵan, dep habarlaıdy QazAqparat tilshisi.
«Bizdiń syılyq kez-kelgen adamǵa erlik arqyly búkil elge tanymal bolýǵa múmkindik beredi. Osylaısha, basqa adamdarǵa eń jaqsy úlgi kórsetý, olardyń júrekterin jaryqtandyrý, jaýapkershilik pen meıirimdilikke ıtermeleý. Bizdiń syılyǵymyz - bul tek marapat qana emes, bul úlken halyqtyq alǵys», - dep jazdy Álııa Nazarbaeva Instagram-daǵy paraqshasynda.
12 jeńimpazdyń árqaısysyna ol óz atynan mıllıon teńge kóleminde aqshalaı syılyq tabystady.
Esterińizge sala keteıik, 2016 jyldyń kókteminde ónerkásiptik alpınıster Aleksandr Shahov pen Andreı Lobov Atyraýda kelisimshart boıynsha ǵımarat qasbetindegi jumysty istegen. Olar bireýdiń aıqaılap kómekke shaqyrǵanyn estip, tútin ıisin sezgen. Esh kidirmesten kómekke asyqqan. Belgili bolǵandaı, segizinshi qabattaǵy páter órtenip, ishinde kishkentaı bala men áıel bolǵan. Alpınıster esikti asha almaǵan. Sodan keıin Aleksandr shatyrdan arqan laqtyryp, segizinshi qabattaǵy terezege deıin túsip, jas ananyń qolynan balany alǵan. Sodan keıin ol áıeldi taǵy bir arqanmen baılap páterden shyǵarǵan. Áıel kók tútinge oranǵan páterden shyǵyp, tereze aldyndaǵy taqtaı shetinde turyp, qutqarýshysymen birge órt sóndirýshilerdi kútken.
Andreı Lobov osy ýaqytta joǵaryda dosy men áıeldiń qulap ketpeýi úshin arqandardy ustap otyrǵan.
Bul oqıǵa búkil Atyraýdy dúr silkindirdi. Kóptegen buqaralyq aqparat quraldary bul jaǵdaı týraly maqala jazdy. Jýrnalısterdiń: «Ózińizge qaýip tónip turǵany týraly oı bolǵan joq pa?» degen suraǵyna er adamdar: «Oılanatyn nesi bar? Adamdardy qutqarý kerek boldy» dep jaýap berdi.
Adam Bol birinshi jahandyq qazaqstandyq syılyǵynyń laýreattaryn marapattaý rásimi 6 naýryzda saǵat 10.00-de ótedi.
