Adamdy kóshede toqtatyp áskerge alyp ketý qanshalyqty zańdy – zańger jaýap berdi
ÓSKEMEN. KAZINFORM – «Áskerı komıssarıat qyzmetkerleriniń jigitterdi kóshede toqtatyp áskerge alyp ketýge quqyǵy bar ma?» degen suraqqa zańger Alekseı Bajkov jaýap berdi.
El arasynda áskerı komıssarıat qyzmetkerleriniń adam kóp júretin saýda úılerin, demalys oryndaryn torýyldap, jigitterdi áskerge alyp ketken jaǵdaılar týraly sóz tarap júr. Bundaı áńgime ásirese áskerge shaqyrý maýsymy aıaqtalýǵa jaqyndaǵanda jıi aıtylady. Keıbireýler «áskerden qashyp júrgenderdi osylaı májbúrlegen durys» dese, endi basqalary «bul adamnyń quqyǵyn buzý» dep esepteıdi.
«Bul máselede «Áskerı qyzmet jáne áskerı qyzmetshilerdiń mártebesi týraly» Zańnyń 30-babynda naqty tujyrym joq. Onda azamatqa áskerge shaqyrý qaǵazyn jeke tapsyrý múmkin bolmasa, onyń kelýin qamtamasyz etý quzyrly organǵa júkteletini aıtylǵan.
Biraq kelýin mindetteý QR ÁQBtK nemese basqa qandaı normalar sheńberinde oryndalýy kerektigi naqty kórsetilmegen», - deıdi Alekseı Bajkov.
Eger polıtseıler men áskerı komıssarıat qyzmetkerleri óz áreketterin QR Ákimshilik quqyq buzýshylyq týraly 647-babyna (Azamattardyń áskerı esepke alý jónindegi mindetterin oryndamaýy) negizdese, onda barlyq is-áreket qatań túrde osy baptyń talaptaryna sáıkes júrgizilýi tıis.
«ıAǵnı, áýeli adamdy ustaıdy, sosyn tıisti jerge jetkizedi. Dese de bárin birdeı ustaı berýge taǵy jol berilmeıdi. Sebebi ustaý – is júrgizýdi qamtamasyz etý sharasy retinde quqyq buzýshylyqtyń jolyn kesý nemese jeke, zańdy, laýazymdy tulǵalardyń jeke bas bostandyǵyn qysqa merzimdi shekteý bolyp sanalady. Bul sanktsııa tek quqyq buzýshyǵa ǵana qoldanylady», - deıdi zańger.
Zań boıynsha adamnyń ustalǵany týraly mindetti túrde hattama jasalýy qajet.
«Eger ustalǵan adamǵa qandaı da bir zalal keltirilse laýazymdy tulǵa jaýap beredi. Mundaı áreketter bolyp jatsa mindetti túrde shaǵym túsirý kerek. Quqyq qorǵaý organynyń qyzmetkeri sizdiń shaǵymyńyzben kelispeýi ábden yqtımal. Sondyqtan Zańda qalaı áreket etý kerektigi naqty jazylmasa, osyndaı keleńsizdikter bola beredi», - deıdi A.Bajkov.
