Adamdarǵa kómektesýdi óz boryshym sanaımyn - almatylyq polıtseı
Ol patrýldik polıtsııa polkiniń ınspektory Rýslan Muqashev esimdi azamat bolyp shyqty.
«Kómekke muqtaj jandarǵa jıi kómektesip turamyn. Maǵan egde jastaǵy qarııalar men jolda qıyn jaǵdaıǵa qalǵan áıelder de kezdesti. Facebook-te jarııalanǵan alǵysqa qatysty aıtsam, ol kúni Kók bazar mańynan ótip bara jatqanmyn. Sol kezde kóliginiń qasynda jan-jaqqa qarap, alańdap turǵan áıeldi kórdim. Oǵan kómek qajet ekeni belgili edi. Toqtap, qasyna barǵanda kóliginiń dóńgeleginen jel shyqqanyn kórdim. Men «kómek qajet pe?» dep suraǵanda, ol balasyn kútip turǵanyn aıtty. Biraq, keıin belgili bolǵandaı, balasy da dóńgelek aýystyra almaıdy eken. Sosyn ózim kómekteseıin dep sheshtim», - dedi Rýslan Muqashev.
Rýslan Muqashev 19 jasynan beri ishki ister organdarynda qyzmet etedi. Efreıtor sheninde qyzmetin bastaǵan ol qazir aǵa leıtenantqa deıin ósti. Qazir ol 27 jasta.
Adamdarǵa kómektesýdi óziniń boryshy sanaıdy.
«Eger áldebir kisige kómektesý qolymnan kelse, mindetti túrde kómektesemin. Meni bala kezimnen solaı tárbıeledi. Otbasymda tuńǵysh balamyn. Mektep jasynan organdarda qyzmet etkim keldi. Bala kezimnen bolashaqta forma kıetin qyzmette bolatynymdy bildim. Biraq, qandaı forma kıetinimdi bilgen joqpyn. Men qazir polıtseımin, oǵan ókinbeımin de. Ózimniń qyzmetime óte razymyn. Sebebi, biz qoǵamdyq tártiptiń saqtalýyna atsalysamyz. Maǵan ol unaıdy», - dedi ol.
Polıtseı sondaı-aq qala joldarynda qandaı júrgizýshiler jıi kezdesetinin aıtty.
«Óz qyzmetine adal polıtseıler óte kóp. Degenmen, keı júrgizýshiler jol júrý erejesin bile tura ony ádeıi buzyp, shaǵymdanyp, arandatýǵa deıin baryp jatady. Biz túsinistikpen qaraýǵa tyrysyp, olardy sabyrǵa shaqyryp jatamyz», - dedi ınspektor Rýslan Muqashev.
