Adamdarǵa balaly bolǵany úshin aqsha tóleýdiń máni bar ma – VVS
NUR-SULTAN. QazAqparat - Búkil Eýropa boıynsha týý kórsetkishi kemip jatyr. Al keıbir memleketter bul qubylyspen kúresý úshin qarjylyq sharalardy qolǵa alǵan. Degenmen, balaly bolǵandarǵa aqsha tóleýdiń máni bar ma? dep jazady VVS.
«2013 jyldan bastap Fınlıandııanyń Lestııarvı aýylynda týǵan ár balaǵa 10 000 eýro tólenip keledi. Degenmen, soǵan qaramastan Fınlıandııada týý kórsetkishi artqan joq. Sońǵy onjyldyqta basqa da Eýropa elderindegideı, Fınlıandııada bala týý kórsetkishi azaıǵan» deı kele, avtor Fınlıandııada otbasylyq baǵdarlamalardyń kóp ekenin aıtady.
Onyń jazýynsha, munda jas otbasyǵa bastapqy kapıtal beriledi, ár balaǵa 100 evro járdemaqy tólenedi jáne bala toǵyzǵa tolǵansha áıel jalaqysynyń 70%-yna teń járdemaqy alady.
«Fınlıandııa Eýroodaq boıynsha basqa memleketterge qaraǵanda otbasylyq járdemaqylarǵa memlekettiń kóp qarjysyn jumsaǵanymen, otbasylyq saıasat áli de artta keledi. Otbasylarǵa qarjylyq qoldaý kórsetý mańyzdy bolǵanymen, mamandar týý kórsetkishiniń artýyna áıelderdiń eńbek naryǵyna aralasýy áser etedi dep oılaıdy. Sarapshylardyń aıtýynsha, bala týýǵa ıtermeleý kúrdeli másele bolǵandyqtan, ony tek qana aqshanyń kómegimen sheshý múmkin emes» dep jazady basylym.
