Adamdardyń senimine kirý arqyly 5 mıllıon teńgeni ıemdengen alaıaq tutqyndaldy
ASTANA. Naýryzdyń 27-si. QazAqparat - Astana qalalyq ІІD Uıymdasqan qylmyspen kúres basqarmasynyń qyzmetkerleri adamdardyń senimine kirý arqyly 5 mıllıon teńgeni ıemdengen elordalyq alaıaqty qolǵa túsirdi.
Bul aqparatty atalǵan vedomstvonyń til saıasaty jáne aqparat bólimi taratyp otyr.
32 jastaǵy elordalyq azamat jas kelinshekpen tanysyp, onyń senimine kirý úshin meıramhanalarǵa qydyrtyp, óziniń «dos» bolǵysy keletin kóńilin bildiredi. Áıel senimine ıe bolǵan alaıaq kelinshektiń jaqyndarymen tanysyp, bir kúni jas áıeldiń ákesinen kólik satyp alýǵa qaryz aqsha suraıdy. Qyz ákesiniń qolma-qol aqshasy joq ekendigin estigen alaıaq aısaıynǵy tólemdi ýaqytyly ózi ótep turatyndyǵyn aıtyp, bankten nesıe alyp berýin ótinedi. Qyzynyń senimine kirgen onyń sózine aldanǵan áke Reseı jınaq bankinen jalpy somasy 3 850 000 teńgeni aǵasynyń atyna rásimdep, alyp beredi. Sonymen qatar alaıaqtyń ótinishimen kelinshek pen onyń sińlisi de 1 150 000 teńgeni quraıtyn nesıe rásimdep, qolyna ustady.
Jospary oryndalǵan jigit qaltaǵa aqsha túskennen keıin tanysymen, onyń týystarymen aradaǵy baılanysty úzgen. Qazirgi ýaqytta alaıaqtyń dál osyndaı tásilmen basqa da adamdardyń aqshasyn ıemdenip ketkendigi belgili bolyp otyr.
«Tutqyndalǵan azamattyń ústinen birneshe qylmystyq is qozǵaldy. Olardyń arasynda QR QK 177 baby da bar. Bul bap boıynsha múlkin tárkileý arqyly 10 jylǵa deıin bas bostandyǵynan aıyrý jazasy qarastyrylǵan», delingen baspasóz habarlamasynda.
