Adamdardyń dástúrli konfessııalardan ketkisi kelmeı qalatyndaı jaǵdaı jasaý qajet - Qaırat Lama Sharıf
ASTANA. 19 naýryz. QazAqparat - Adamdardyń dástúrli konfessııalardan ártúrli aǵymdarǵa ketip qalýy ultymyz ben memleketimizdiń birtutastyǵyna qaýip tóndiredi, sondyqtan azamattarymyzdyń bundaı qadamǵa barýynyń aldyn alý qajet. Bul týraly búgin Astanada ótken «Qazaqstandaǵy din bostandyǵy» taqyrybyndaǵy halyqaralyq konferentsııada QR Din isteri agenttiginiń tóraǵasy Qaırat Lama Sharıf aıtty.
«Óziniń ulttyq derbestigin endi ǵana qalyptastyryp kele jatqan jas memlekettegi din bostandyǵy týraly aıtqan kezde, prozelıtızm ıaǵnı adamdardyń óziniń tarıhı ári dástúrli dininen múlde basqa aǵymdaǵy senim-nanymǵa ótip ketýi sııaqty mańyzdy máselege toqtalmaý múmkin emes. Keıbir adamdardyń túrli dástúrli emes kontsessııalarǵa ótýi, tipti olar resmı moıyndalǵan bolsa da, jalpy qoǵamnyń narazylyǵyn týǵyzatyny jasyryn emes. Osy jerde ulttyń rýhanı birligi mańyzdy ma, álde ındıvıdtiń tańdaý quqyǵy mańyzdy ma degen dılemma týady?», dedi Q. Lama Sharıf.
«Sondyqtan, - dedi ol, - bul máselede bir otandyq sarapshynyń mysalyna júgingim keledi. Onyń aıtýynsha, bir bilimdi, bilikti, jelkildegen jas jigit shetelde turaqty turýǵa qujattaryn tapsyrýda delik. Bul el úshin bir adamyn joǵaltý ma? Iá, solaı. Alaıda bulaı jasaýǵa onyń quqyǵy bar ma? Árıne, bar, óıtkeni adamnyń ózi qalaǵan elinde turý quqyǵyn eshkim shekteı almaıdy.
Al eger myńdaǵan jastar dál osylaı jasasa she? Olardyń árqaısysynyń tańdaý quqyǵy bar ǵoı. Alaıda bul jaǵdaıda memleket qol qýsyryp qarap otyra almaıdy. Biraq memleket olardyń shetelge ketýine tyıym sala ala ma? Árıne, olaı da isteı almaıdy! Sondyqtan jańaǵy jastardyń óz elinen ketkileri kelmeı qalatyndaı jaǵdaı týdyrý kerek. Sonda adamdardyń quqyǵy da taptalmaıdy, memlekettiń múddesi de oryndalady».
Vedosmtvo basshysy osy máselede memlekettiń iri-iri dástúrli kontsessııalardyń rólin jete túsinýi qajet ekenin basa aıtty.
«Men bul jerde jastar týraly jaıdan-jaı aıtyp turǵan joqpyn. Dál osy jastarymyz kóbinese dástúrli emes aǵymdardyń jeteginde ketip qalyp jatady. Budan túıerimiz, bir urpaq aýysqan kezde elimizdiń dinı ahýaly adam tanymastaı ózgeredi degen sóz. Sol ózgeristerdiń Qazaqstannyń múddesine emes, kerisinshe bizdiń tabıǵı baılyǵymyzǵa kóz salyp otyrǵan basqa elderdiń oń jambasyna keletini de jasyryn emes», - dep atap ótti Q. Lama Sharıf.
