Adamdardy órtten qutqarǵan elordanyń eki turǵynyna TJM atynan alǵys hattar tabystaldy
ASTANA. 9 qyrkúıek. QazAqparat - Ótken aptada Astanada Beıbitshilik kóshesindegi №40 úıde órt boldy. Dúkennen shyqqan tilsiz jaý páterlerge jaıyldy. Bul týraly astana.kz saıtyna TJD baspasóz qyzmetinen habarlady.
«Órt sóndirýshiler oqıǵa ornyna kelgenshe úı turǵyndary Lıýdmıla Chepkova men Aqtaı Malıkzatova jedel túrde adamdardy úıden shyǵara bastaǵan. Nátıjesinde 13 adam, sonyń ishinde, 3 bala qutqaryldy. Tóngen qaýipke qaramastan, názik jandylar batyldyq tanytyp, qutqarýshylarǵa evakýatsııa barysynda kómektesti», - delingen TJD baspasóz qyzmetiniń málimetinde.
Elordanyń resmı saıtynyń jazýynsha, órt kezindegi bilikti áreketteri men órtke qarsy qyzmet mamandaryna kórsetken kómekteri úshin Órt sóndirý jáne apaty-qutqarý jumystary qyzmeti bastyǵynyń orynbasary Serikjan Turarov Lıýdmıla Chepkova men Aqtaı Malıkzatovaǵa QR TJ mınıstri Vladımır Bojkonyń atynan alǵys hattar tabys etti. Sonymen qatar ol mundaı tótenshe jaǵdaı qaýpi tóngen kezde kez kelgen adam táýekelge bara bermeıtinin aıtyp, azamatshalarǵa rızashylyǵyn bildirdi.
